Këshilli i Lartë Gjyqësor, pas më shumë se tre muajsh heshtje, është “kujtuar” më në fund për magjistratët e rinj që u emëruan në korrik. Me vendimin nr. 723 datë 20.10.2025, KLGJ ka shpallur zyrtarisht 42 pozicione të lira për gjyqtarët e sapodiplomuar, duke nisur më në fund procesin e sistemimit të tyre në gjykata.
Sipas njoftimit zyrtar, pozicionet e lira janë të shpërndara në disa gjykata të vendit:
– 3 vende në Gjykatën e Shkallës së Parë Berat,
– 7 në Elbasan,
– 7 në Fier,
– 2 në Gjirokastër,
– 2 në Korçë,
– 2 në Kukës,
– 4 në Lezhë,
– 1 në Sarandë,
– 5 në Shkodër,
– 2 në Vlorë,
– 7 në Gjykatën Administrative të Shkallës së Parë Lushnjë.
Të gjithë magjistratët që përfunduan Shkollën e Magjistraturës dhe u emëruan në korrik, janë ftuar të dërgojnë brenda datës 21 tetor 2025, duke u lënë vetëm një ditë kohë, deklaratën me tre preferencat e tyre për gjykatat ku duan të caktohen. Pas këtij afati, KLGJ do të nisë procesin e përzgjedhjes dhe caktimit përfundimtar të vendeve.
Ndërkohë, që këta magjistratë të rinj kanë qenë në pritje që nga korriku pa ndonjë funksion konkret, gjykatat në shumë qytete vazhdojnë të funksionojnë me mungesë të ndjeshme gjyqtarësh.
Mbetet për t’u parë nëse ky vendim do të shënojë fundin e pritjes, apo nëse edhe këtë herë KLGJ do të ngecë në ritmin e vet të ngadaltë burokratik.
