Tarik Ramadan, studiuesi i njohur islamik zvicerano-egjiptian, është dënuar për përdhunimin e tre grave në Paris, me një vendim të dhënë nga një gjykatë penale franceze që e shpalli fajtor dhe e dënoi me 18 vite burg.
Vendimi shënon një tjetër goditje të fortë për figurën e dikurshme të njohur akademike, ish-profesor në Universitetin e Oksfordit, i cili prej vitesh është përballur me akuza të shumta për përdhunim si në Francë ashtu edhe në Zvicër, ku më herët është dënuar.
Ramadan, një figurë karizmatike por gjithashtu shumë e debatueshme në diskursin e Islamit në Europë, ka mohuar vazhdimisht akuzat ndaj tij.
Procesi gjyqësor në Paris nisi më 2 mars dhe lidhej me përdhunime të pretenduara ndaj tre grave në periudhën 2009–2016. Megjithatë, Ramadan nuk ishte i pranishëm fizikisht në sallën e gjyqit. Avokati i tij argumentoi se ai ishte shtruar në spital në Gjenevë për shkak të një përkeqësimi të sklerozës multiple, por kjo arsye u rrëzua nga një ekspertizë mjekësore e urdhëruar nga gjykata.
Gjyqtarja kryesuese, Corinne Goetzmann, bëri të ditur se ndaj tij është lëshuar një urdhër arresti. Gjithashtu, pas përfundimit të dënimit, Ramadan nuk do të lejohet të rikthehet më në territorin francez.
Në vitin 2025, Gjykata e Lartë e Zvicrës kishte refuzuar apelimin e tij për një dënim të mëparshëm për përdhunimin e një gruaje në një hotel në Gjenevë, duke lënë në fuqi dënimin me tre vite burg, nga të cilat dy me kusht.
Para shpërthimit të skandalit, Ramadan ishte një nga zërat më të njohur në studimet bashkëkohore islame, me angazhime akademike në universitete ndërkombëtare, përfshirë Katarin dhe Marokun. Ai u detyrua të largohej nga detyra në vitin 2017, kur dolën në publik akuzat për përdhunim në kulmin e lëvizjes “Me Too”.
