Autoritetet amerikane të emigracionit kanë ndaluar komentatorin dhe analistin politik britanik Sami Hamdi, duke i revokuar vizën dhe duke njoftuar se ai do të dëbohet nga Shtetet e Bashkuara, në vend që t’i lejohet të përfundojë turin e tij të fjalimeve në vend, ka bërë të ditur të dielën një zyrtar i Departamentit të Sigurisë Kombëtare.
Sipas një postimi në rrjetin social X nga zëdhënësja e Departamentit, Tricia McLaughlin, Hamdi ndodhet aktualisht në paraburgim. “Nën Presidentin Trump, ata që mbështesin terrorizmin dhe minojnë sigurinë kombëtare të Amerikës nuk do të lejohen të punojnë apo të vizitojnë këtë vend,” shkroi ajo.
Hamdi, kryeredaktor i platformës “The International Interest”, foli të shtunën në një gala të Këshillit për Marrëdhënie Amerikano-Islamike (CAIR) në Sakramento, Kaliforni, dhe ishte planifikuar të merrte pjesë në një tjetër aktivitet të organizatës të dielën në Florida. Sipas CAIR, ai është ndaluar në aeroportin ndërkombëtar të San Franciskos.
Figura konservatore në SHBA kishin bërë thirrje më herët që administrata Trump ta dëbonte Hamdin nga vendi. Ndërkohë, CAIR ka kërkuar lirimin e menjëhershëm të tij, duke e akuzuar administratën për ndalim politik për shkak të kritikave të Hamdit ndaj qeverisë izraelite.
Zëvendësdrejtori i CAIR-it, Edward Ahmed Mitchell, deklaroi se avokatët e organizatës nuk kanë mundur të kontaktojnë me Hamdin deri të dielën në mbrëmje, ndërsa theksoi se Hamdi kishte mohuar publikisht çdo mbështetje ndaj grupeve militante islamike.
Në një deklaratë zyrtare, CAIR e cilësoi arrestimin si “rrëmbim të një gazetari dhe komentatori të shquar mysliman britanik për shkak të kritikave të tij ndaj genocidit të qeverisë izraelite”, duke e quajtur atë “një shkelje të hapur të lirisë së fjalës”.
Aktivistja konservatore Laura Loomer tha të dielën se ajo “merr meritën” për arrestimin e Hamdit.
Që prej janarit, administrata Trump ka nisur një fushatë të gjerë kundër emigracionit, përfshirë kontrolle të shtuara të mediave sociale, revokim vizash për persona që kanë shprehur mbështetje për Palestinën ose kanë kritikuar Izraelin, si dhe deportime të studentëve apo mbajtësve të green card-it që kanë komentuar kundër operacioneve ushtarake izraelite në Gaza.
(Burimi: Reuters)
