Pas fasadës së një prej metropoleve më të pasura në botë, Londra po përballet me një realitet të ashpër: nivelet më të larta të varfërisë së fëmijëve në të gjithë Anglinë dhe përqendrime alarmante të vështirësive ekonomike. Të dhënat më të fundit tregojnë se rreth 38% e fëmijëve në kryeqytet jetojnë në varfëri relative, një shifër dukshëm më e lartë krahasuar me 29% në Angli në tërësi.
Në disa zona, situata bëhet edhe më dramatike. Në lagje si Tower Hamlets dhe Hackney, më shumë se gjysma e fëmijëve jetojnë nën kufirin e varfërisë, ndërsa në Newham shifra arrin gati 45%. Madje, në nivel zonash zgjedhore, Hackney North dhe Stoke Newington shënojnë kulmin me 60.2%, duke reflektuar një krizë të thellë sociale në zemër të qytetit.
Në të gjithë Britaninë, panorama mbetet shqetësuese: rreth 4 milionë të rinj, ose 27%, jetojnë në familje që fitojnë më pak se 60% të të ardhurave mesatare kombëtare, pasi llogariten kostot e strehimit. Këto shifra kanë mbetur pothuajse të pandryshuara në vitet 2024-2025, duke treguar se përmirësimi është ende i brishtë.
Sipas Pat McFadden, disa tregues si rritja e të ardhurave familjare dhe një rënie e lehtë e pasigurisë ushqimore sugjerojnë se qeveria “po fillon të bëjë një ndryshim”, por ai pranon se sfida mbetet e madhe dhe kërkon ndërhyrje më të thella për të përmbysur trendin.
Ekspertët e lidhin situatën në Londër kryesisht me krizën e strehimit. Qiratë e larta kanë çuar në nivelet më të larta të varfërisë materiale në Mbretërinë e Bashkuar, duke nënkuptuar paaftësinë e familjeve për të përballuar nevoja bazë si ngrohja e shtëpisë apo ushqimi i shëndetshëm.
Jashtë kryeqytetit, zonat më të prekura përfshijnë Birmingham, ku rreth 115,000 fëmijë (44.9%) jetojnë në varfëri, si dhe Pendle në Lancashire dhe Manchester, me norma mbi 42%. Ndërkohë, rajoni juglindor i Anglisë paraqet nivelin më të ulët, me 20.8%.
Në nivel kombëtar, diferencat rajonale janë të theksuara: Uellsi regjistron 32% të fëmijëve në varfëri, Anglia 29%, ndërsa Skocia dhe Iranda e Veriut qëndrojnë më poshtë me 21% dhe 19%.
Raporti “Familjet nën të Ardhurat Mesatare”, i bazuar në një metodologji të re për matjen e të ardhurave që nga viti 2021-2022, nxjerr në pah edhe një aspekt tjetër kritik: pothuajse tre të katërtat e fëmijëve që jetojnë në varfëri janë pjesë e familjeve ku të paktën një i rritur është i punësuar. Ndërkohë, 40% e personave nën kufirin e varfërisë janë me aftësi të kufizuara dhe 2.8 milionë fëmijë jetojnë në atë që klasifikohet si “varfëri e thellë”, me të ardhura më pak se 40% e pragut.
Aktivistët paralajmërojnë se situata mbetet kritike, me përdorimin e bankave ushqimore në nivele rekord dhe shumë familje që përballen ende me zgjedhje të vështira mes ushqimit dhe energjisë. Sipas Peter Matejic, të dhënat tregojnë një rritje të lehtë të varfërisë së përgjithshme gjatë vitit të parë të qeverisë laburiste.
Për të ndryshuar këtë realitet, qeveria synon të heqë limitin e përfitimit për dy fëmijë dhe të zgjerojë programet e vakteve falas në shkolla për familjet që përfitojnë kredi universale, si dhe të rrisë pagën minimale. Megjithatë, sipas Sophie Livingstone, këto masa janë vetëm një fillim dhe kërkohet një angazhim më i madh për t’u dhënë fëmijëve një start më të drejtë në jetë.
Në një qytet simbol i mundësive dhe pasurisë globale, këto shifra tregojnë një realitet tjetër: për mijëra fëmijë, mbijetesa mbetet sfida e përditshme.
(Burimi: The Guardian)
