Sot, kryeministri Edi Rama e hapi ditën me një status në Facebook-un e tij – RAPORTI QË NUK DO TA GJENI NË KANALE E PORTALE.
Rama ka nxjerrë në rrjet vlerësimin e fundit të Bertelsmann Stiftung (BTI 2026), ku Shqipëria renditet në krye të rajonit për transformimin politik dhe qeverisjen, por pozicionohet mirë në treguesit ekonomikë.
Një pjesë të raportit kryeministri e përdor për të kritikuar ashpër mediat për mungesë pavarësie dhe objektiviteti, ndërsa me një pjesë tjetër ai e referon për të promovuar progresin qeverisës të Shqipërisë.
“Ballokumet” Elbasani
Vlerësimi lavdërues dhe “ekzekutues” njëherësh, që të jep përshtypjen e “shqiponjës” me dy krerë, në fakt është “dhuratë” e dy studiuesve me mbiemër Elbasani – motër e vëlla, Arolda Elbasani dhe Sejmir Elbasani.
BTI është një indeks global, i cili analizon demokracinë, ekonominë dhe qeverisjen në mbi 130 vende. Megjithatë, vlerësimet e tij bazohen në analiza të ekspertëve të veçantë që futen nëpërmjet projekteve të ndryshme në këtë institucion vlerësues.
Me një kontroll të thjeshtë në faqen zyrtare të raportit tregohet se për Shqipërinë, analiza është hartuar nga vetëm dy raportuesit nga Shqipëria: Arolda Elbasani dhe Sejmir Elbasani. Pra, një vlerësim për Shqipërinë mbështetet tek dy zëra që vijnë nga e njëjta familje dhe nga vetë vendi që analizohet, çka natyrshëm ngre pikëpyetje për balancën dhe përfaqësimin.
Arolda Elbasani rezulton me një angazhim në projekte dhe rrjete akademike ndërkombëtare, por e përfshirë ngushtë me iniciativa të lidhura me fondacionin Soros Foundation. I vëllai, Sejmir Elbasani, është një menaxher kryesor në bankën turke BKT në Shqipëri, bankë që ka lidhje të forta me qeverinë dhe institucionet shqiptare. Nëse ky fakt nuk përbën domosdoshmërisht një problem, nga ana tjetër është një element që hedh dyshime për të dhënat e raporteve dhe vlerësimeve që sponsorizohen nga jashtë për t’u përdorur në diskursin politik të brendshëm.
Kryeministri e përdor vlerësimin “Bertelsmann” sikur kjo është e vërteta e besueshme që vjen nga kanale serioze ndërkombëtare, kur në fakt Indeksi i Transformimit Bertelsmann (BTI), për më shumë se 15 vjet mbështetet nga “Fondacioni Bertelsmann”, i cili analizon dhe vlerëson nëse dhe si vendet në zhvillim dhe vendet në tranzicion po e drejtojnë ndryshimin shoqëror drejt demokracisë dhe ekonomisë së tregut. Dhe këtë analizë apo vlerësim BTI e bën mbështetur në ekspertë të vendit që vlerësohet. Ata paraqesin të dhëna për shkallën e përmbushjes së treguesve për secilin vend të përfshirë dhe janë pikërisht ata që bëjnë një analizë të transformimit ekonomik dhe politik, si dhe qeverisjes në vendet që i njohin shumë mirë.
Kjo është arsyeja që motra dhe vëllai nga Elbasani janë përfshirë në këtë vlerësim si ekspertë të vendit për të cilin flitet, Shqipëria, por vlerësimet e tyre s’mund të paraqiten si “ballokume” që të serviren nga kryeministri për t’i ngrënë shqiptarët të shtunën e fundit të marsit.
Mediat vendase që kritikohen për nga besueshmëria dhe objektiviteti, vendosen pa asnjë rezervë dhe qorrazi përballë vlerësimeve që burojnë nga ekspertizë dhe ekspertë të “gatuar” në Shqipëri.
Pasi çështja nuk është vetëm sa mirë renditet Shqipëria në një raport ndërkombëtar, por sa i qëndrueshëm dhe i paanshëm është vetë raporti.
Nëse mediat vendase kritikohen për mungesë objektiviteti, pse raportet ndërkombëtare “hahen” menjëherë kur dalin – sikur janë ballokume Elbasani?
© Ky është shkrim ekskluziv i kontrasT.al, i cili gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar burimin e tij.
