1 muaj luftë dhe Irani e ka hapur frontin e sulmeve në gjithë Lindjen e Mesme, ndaj shteteve që ai i konsideron aleate të “armikut”. Armiqtë e vërtetë, ata që e kanë sulmuar, janë SHBA dhe Izraeli, por Irani i konsideron të gjitha vendet e Gjirit, që strehojnë baza dhe interesa amerikane apo izraelite – armiq të drejtpërdrejtë.
Mbi Arabinë Saudite, Emiratet e Bashkuara Arabe, Katarin, Bahreinin, Kuvajtin, Jordaninë dhe Omanin janë hedhur me qindra raketa dhe dronë, me qëllim dekurajimin e tyre dhe të aleatit të përbashkët – SHBA.
Me gjithë skepticizmin ndaj forcës ushtarake iraniane, përballë fuqisë së përbashkuar amerikano-izraelite, lufta ka një muaj që vazhdon dhe duket sikur anon nga “fitorja” e Iranit, tё cilit nuk po i mbaron arsenali ushtarak.
Sa raketa kishte Irani?
Ndoshta një llogari e gabuar është bërë nga shërbimet ushtarake amerikane dhe Mosadi, që supozohet se informohet për detajet më të vogla të çdo kundërshtari. Ajo që paraqitet në grafik është mbresëlënëse nga koncepti ushtarak.
Irani ka goditur me raketa dhe dronë 5,609 herë mbi vendet që i konsideron armiqësore në brigjet përballë Ngushticës së Hormuzit, pa llogaritur goditjet e shumta që ka bërë në Izrael, Irak deri në baza të largëta në Oqeanin Indian, siç ishte sulmi i disa ditëve më parë në ishullin Diego Garcia.
A do të ketë kapacitete të vazhdojë këtë trend sulmues Irani?
Mbetet për t’u parë, sa kohë që nga fronti i luftës raportohet se janë nisur tratativat nga ndërmjetësuesi pakistanez, për t’i ulur palët ndërluftuese në një tryezë negociatash në Pakistan, ndërkohë që “pushtimi tokësor” duket në horizont.
Anija luftarake USS Tripoli, me 3,500 marinsa amerikanë, ka mbërritur në Lindjen e Mesme. Dhe kjo nuk është fare shenjë e mirë, as shenjë paqeje…
