Autoritetet italiane kanë nisur një hetim ndaj markave të njohura të bukurisë Sephora dhe Benefit, nën pronësinë e gjigantit të luksit LVMH, për mënyrën se si po promovohen produktet e kujdesit për lëkurën tek fëmijët.
Autoriteti Italian i Konkurrencës (AGCM) dyshon se kompanitë kanë përdorur strategji marketingu “veçanërisht të fshehta”, duke përfshirë mikro-ndikues të rinj në rrjetet sociale, për të nxitur blerjen e produkteve kozmetike nga fëmijë edhe nën moshën 10 vjeç.
Sipas hetimit, firmat mund të mos kenë bërë të qartë se produktet e tyre – përfshirë kremrat kundër plakjes, serumet dhe maskat e fytyrës – nuk janë të destinuara për përdorim nga fëmijët, duke krijuar kështu një perceptim të gabuar tek konsumatorët më të rinj.
AGCM paralajmëron se këto praktika mund të kenë kontribuar në përhapjen e fenomenit të quajtur “kozmetikoreksi”, një fiksim i pashëndetshëm me kujdesin për lëkurën tek të rinjtë, i cili po shqetëson gjithnjë e më shumë ekspertët.
Si pjesë e hetimit, autoriteti dhe policia financiare italiane kanë kryer kontrolle në selitë e LVMH dhe Sephora në Itali.
Rrjetet sociale kanë luajtur një rol kyç në këtë trend, veçanërisht përmes fenomenit “Sephora kids”, ku fëmijët publikojnë video me rutina bukurie dhe produkte të blera, duke përdorur etiketa si “Sephora kids haul” apo “GRWM” (Get Ready With Me- Bёhu gati me mua).
Ekspertët e shëndetit dhe Shoqata Britanike e Dermatologëve kanë paralajmëruar se përdorimi i hershëm i produkteve kozmetike mund të jetë i dëmshëm për fëmijët, duke shkaktuar irritime, reaksione alergjike dhe madje probleme të përhershme të lëkurës.
Autoritetet italiane theksojnë gjithashtu se paralajmërimet për përdorimin e këtyre produkteve nga fëmijët mund të kenë munguar ose tё jenё paraqitur në mënyrë të paqartë dhe mashtruese.
Nga ana tjetër, LVMH ka deklaruar se do të bashkëpunojë plotësisht me hetimin, duke riafirmuar se të gjitha kompanitë e saj respektojnë rregulloret italiane në fuqi, por pa dhënë komente të mëtejshme për çështjen.
(Burimi: BBC)
