Xhamajka po përballet me një nga stuhitë më të fuqishme në historinë e saj, teksa uragani Melissa, tashmë i kategorisë 5, po afrohet me erëra që tejkalojnë 230 kilometra në orë dhe reshje të rrëmbyeshme që mund të shkaktojnë përmbytje masive dhe rrëshqitje dheu.
Autoritetet kanë shpallur gjendjen e jashtëzakonshme në të gjithë territorin dhe kanë urdhëruar evakuime të detyrueshme në zonat bregdetare dhe të ulëta. Aeroportet janë mbyllur, qindra strehimi janë hapur nëpër shkolla dhe godina publike, ndërsa energjia elektrike është ndërprerë në disa rajone si masë sigurie.
Ministri i Qeverisjes Lokale paralajmëroi se “shumë komunitete nuk do t`i mbijetojnë dot përmbytjeve nëse uragani godet me fuqinë e parashikuar.” Meteorologët raportojnë se stuhia po lëviz shumë ngadalë mbi Karaibe, duke rritur rrezikun e dëmeve të zgjatura nga erërat dhe reshjet e dendura.
Qytetet jugore dhe perëndimore të vendit, përfshirë Negril dhe Savanna-la-Mar, pritet të goditen më rëndë nga valët e larta që mund të depërtojnë disa metra në brendësi të tokës.
Shërbimi Meteorologjik i Xhamajkës paralajmëron se përmbytjet mund të arrijnë deri në një metër shi në disa zona malore, ndërsa rrëshqitjet e dheut dhe ndërprerjet e komunikimit pritet të izolojnë shumë komunitete rurale.
Organizatat ndërkombëtare të ndihmës po mobilizohen për t’u ardhur në ndihmë banorëve, ndërsa Qeveria ka kërkuar mbështetje emergjente nga Shtetet e Bashkuara dhe Kanadaja.
Sipas Organizatës Botërore Meteorologjike, “Melissa” mund të jetë stuhia më e fuqishme që ka goditur Xhamajkën në këtë shekull, duke tejkaluar madje dhe uraganin “Gilbert” të vitit 1988.
Autoritetet u bëjnë thirrje qytetarëve të mos lëvizin nga shtëpitë dhe të ndjekin udhëzimet e emergjencës, ndërsa stuhia pritet të arrijë kulmin e saj në orët e ardhshme.
(Burime: Reuters, The Guardian, Time, AccuWeather)
