Japonia ka hyrë zyrtarisht në sezonin e shumëpritur të sakurës, me pemët e qershisë që kanë arritur lulëzimin e plotë në shumë qytete, duke kthyer vendin në një spektakël ngjyrash rozë dhe të bardhё.
Në qytetin historik të Kyotos, autoritetet shpallën zyrtarisht kulmin e lulëzimit pasi monitoruan një pemë referencë në kështjellën Nijō Castle, një sit i trashëgimisë botërore. Edhe në Tokyo, lulet arritën kulmin gjatë fundjavës, duke krijuar një atmosferë magjike që tërheq mijëra vizitorë.
Sezoni i sakurës shënon një nga momentet më të rëndësishme kulturore në Japoni. Familjet dhe miqtë mblidhen në parqe, tempuj dhe hapësira publike për të festuar “hanami” – traditën e shijimit të luleve – duke ngrënë, pirë dhe kaluar kohë nën pemët në lulëzim.
“Ne kemi ndjenja shumë të veçanta për sakurën”, tha një banore e Tokios, duke theksuar se bukuria e saj qëndron pikërisht te fakti që zgjat shumë pak. Lulëzimi i plotë zgjat vetëm rreth një javë, përpara se petalet të bien si “borë rozë”.
Lulet e qershisë në Japoni simbolizojnë njëkohësisht energjinë e re dhe brishtësinë e jetës. Ato përkojnë me fillimin e vitit të ri akademik dhe tё biznesit, një periudhë ndryshimesh ku shumë të rinj nisin punën, ndërsa të tjerë largohen nga qytetet e tyre për një kapitull të ri.
Ndërkohë, meteorologët ndjekin me vëmendje kulmin e lulëzimit në çdo rajon, duke këshilluar qytetarët për ditët më të mira për ta përjetuar këtë fenomen unik.
Si për turistët, ashtu dhe pёr vendasit, sakura mbetet një përvojë që nuk zgjat shumë – por që çdo vit rikthehet për të kujtuar bukurinë e çastit.
(Burimi: France 24 / AFP)
