Një rezidencë elegante që dikur i përkiste Karl Lagerfeld është hedhur në treg, dhe çmimi i saj — rreth 2.7 milionë euro — është më i ulët nga sa do të prisnin shumë për një pronë me një histori kaq të pasur.
E vendosur më pak se një orë larg Paris, rezidenca “Manoir du Mée” është një ndërtesë e shekullit të 18-të me shtatë dhoma gjumi, që ka kaluar në duart e disa prej figurave më të njohura të Europës. Pas Lagerfeld, ajo u bë shtëpia e Princeshёs Karolinё tё Monakos dhe familjes së saj, të cilët jetuan aty për disa vite.
Shtëpia, e ndërtuar në vitin 1749 për familjen Faguier, ruan ende elemente autentike të arkitekturës klasike franceze: parket Versailles, panele muri, oxhaqe tradicionale dhe ambiente që të japin ndjesinë e një klubi privat. Në të kaluarën, ajo ka shërbyer edhe si skenë për sete fotografike të Chanel, përfshirë punime me supermodelen Inès de la Fressange.
Një detaj interesant nga historia e saj: vajza e princeshës, Charlotte Casiraghi, ka lënë vizatime në muret e katit të sipërm — dhe disa prej tyre janë ende të dukshme sot.
Prona shtrihet në një sipërfaqe të madhe prej rreth 5,380 metrash katrorë dhe sipas agjentëve imobiliarë është në gjendje shumë të mirë. Ajo mund të përdoret si rezidencë familjare, por edhe si hapësirë për evente apo projekte kreative.
Lagerfeld, i njohur për stilin e tij unik dhe jetën në lëvizje, kishte një portofol të gjerë pronash luksoze dhe shpesh ndryshonte ambient për të mos u ndjerë i kufizuar nga një stil i vetëm. Një tjetër nga shtëpitë e tij në Paris u shit vitin e kaluar për rreth 10 milionë euro — pothuajse dyfishi i çmimit fillestar.
Në këtë kontekst, “Manoir du Mée” del si një mundësi relativisht “e përballueshme” për një pronë me histori aristokratike dhe lidhje me një nga ikonat më të mëdha të modës.
(Burimi: CNN)
