Donald Trump ka ashpërsuar tonet ndaj aleatëve evropianë, duke i sulmuar publikisht për refuzimin për t’u përfshirë në luftën kundër Iranit dhe duke thelluar përçarjen në marrëdhëniet transatlantike.
Në një seri postimesh në rrjetin e tij Truth Social, ai u kërkoi vendeve që po përballen me mungesë karburanti për shkak të krizës në Ngushticën e Hormuzit që “të shkojnë të marrin naftën e tyre” me forcë nga Gjiri, një deklaratë që ndikoi menjëherë në rritjen e mëtejshme të çmimeve të naftës.
Në të njëjtën kohë, disa vende evropiane kanë ndërmarrë hapa për t’u distancuar nga konflikti. Franca ka bllokuar fluturimet e avionëve izraelitë që transportojnë armë mbi hapësirën e saj ajrore, Italia ka refuzuar lejen për uljen e bombarduesve amerikanë në Siçili, ndërsa Spanja ka ndaluar përdorimin e bazave dhe hapësirës ajrore nga SHBA.
Megjithatë, edhe Anglia, e cila ka lejuar përdorimin e bazave të saj nga SHBA, nuk i ka shpëtuar kritikave të Trump. Ai ironizoi rolin e Marinës Mbretërore, duke sugjeruar se vendi duhet të tregojë më shumë “guxim” për të ndërhyrë në Ngushticën e Hormuzit.
Nga ana tjetër, Emmanuel Macron reagoi përmes zyrës së tij, duke theksuar se Franca nuk ka ndryshuar qëndrim që nga fillimi i konfliktit, ndërsa kritikoi tonin e presidentit amerikan.
Kriza energjetike globale po përkeqësohet, me çmimet e naftës që kanë pësuar luhatje të forta dhe ndikojnë drejtpërdrejt në ekonomitë botërore. Në SHBA, çmimi mesatar i benzinës ka kaluar 4 dollarë për gallon për herë të parë në katër vite, duke rritur presionin e brendshëm mbi administratën.
Ndërkohë, tensionet në terren mbeten të larta. Irani ka goditur objektiva në Gjirin Persik dhe ka paralajmëruar se është i gatshëm të ndalë luftën vetëm nëse plotësohen kushte të caktuara. Presidenti iranian Masoud Pezeshkian u shpreh se vendi i tij ka “vullnetin e nevojshëm” për t’i dhënë fund konfliktit, por kërkon garanci që ai të mos përsëritet.
Nga ana tjetër, SHBA-të kanë përshkallëzuar operacionet ushtarake, duke përdorur bombardues strategjikë dhe duke goditur objektiva kyçe në Iran, përfshirë zona pranë impianteve bërthamore.
Me më shumë se 3,000 viktima dhe një ekonomi globale të tronditur, presioni ndërkombëtar për t’i dhënë fund luftës po rritet. Edhe Papa Leo ka bërë thirrje për paqe, duke shprehur shpresën që konflikti të përfundojë së shpejti.
Pavarësisht deklaratave të Trump se lufta “po i afrohet fundit”, mbetet e paqartë se si mund të arrihet një zgjidhje, ndërsa kërcënimet për përshkallëzim të mëtejshëm vazhdojnë.
