Papa Leo XIV ka bërë një gjest të rrallë dhe simbolik gjatë të Premtes së Madhe, duke mbajtur vetë kryqin në të 14 stacionet e “Rrugës së Kryqit” në Koloseun e Romës, diçka që nuk kishte ndodhur prej dekadash.
Në procesionin e tij të parë si Papë, ai e mbajti kryqin gjatë gjithë ceremonisë njëorëshe, nga brendësia e Colosseum, përmes turmës së besimtarëve dhe deri në kodrën Palatine, ku dha bekimin përfundimtar.
“Është një shenjë e rëndësishme për atë që përfaqëson Papa si udhëheqës shpirtëror në botë… Krishti vazhdon të vuajë dhe unë e mbaj këtë vuajtje në lutjet e mia”, tha ai para ceremonisë.
Rreth 30 mijë besimtarë ndoqën nga afër procesionin, ndërsa meditimet e lexuara gjatë stacioneve theksuan përgjegjësinë morale të atyre që mbajnë pushtet – qoftë për të gjykuar, për të nisur apo ndalur luftëra, apo për të zgjedhur mes dhunës dhe paqes.
Ky gjest e dallon qartë pontifikatin e tij nga paraardhësit. John Paul II kishte mbajtur kryqin në të gjithë procesionin deri në vitin 1995, ndërsa Benedict XVI dhe Francis nuk e mbajtën gjatë gjithë rrugës, kryesisht për arsye shëndetësore.
Në moshën 70-vjeçare, Leo XIV duket në formë të mirë fizike dhe zgjedhja për të mbajtur vetë kryqin interpretohet si një mesazh i fortë simbolik për sakrificën, përgjegjësinë dhe përfshirjen personale në vuajtjet e botës.
“Rruga e Kryqit nuk është për ata që jetojnë një besim të shkëputur nga realiteti, por për ata që e jetojnë atë në botën reale,” thuhej në tekstet e meditimit të kësaj ceremonie.
Ceremonia shënon një nga momentet më të rëndësishme të Javës së Shenjtë, ndërsa Papa pritet të drejtojë vigjiljen e Pashkës dhe meshën madhështore në Sheshin e Shën Pjetrit, duke kulmuar me mesazhin tradicional “Urbi et Orbi”.
