Mbreti Charles III ka marrë një vendim të paprecedentë duke hequr të gjithë titujt dhe nderimet e të vëllait, Princ Andrew, dhe duke e detyruar atë të largohet nga banesa mbretërore “Royal Lodge”.
Vendimi, i konfirmuar nga Buckingham Palace, vjen pas rritjes së presionit publik dhe institucional për shkak të lidhjeve të Andrew me Jeffrey Epstein, i dënuar për abuzim seksual. Nga sot, ai nuk do të njihet më si “Princ” apo “Duka i Yorkut”, por thjesht si Andrew Mountbatten Windsor.
Burime nga pallati mbretëror kanë bërë të ditur se masa është marrë për “shkelje serioze”, pavarësisht se Andrew vazhdon të mohojë çdo akuzë ndaj tij.
Heqja e titullit princëror është një veprim tepër i rrallë në historinë britanike — i fundit rast i ngjashëm daton që prej vitit 1919.
Pas largimit nga rezidenca, Andrew pritet të akomodohet në një shtëpi private dhe do të mbështetet financiarisht nga vetë Mbreti.
Ky vendim sinjalizon qartë vendosmërinë e monarkut për të mbrojtur reputacionin e familjes mbretërore dhe për të vendosur përgjegjësi mbi çdo anëtar të saj, pavarësisht statusit apo gjakut mbretëror.
