Greqia ka vendosur të ndërmarrë një hap të fortë për mbrojtjen e të rinjve nga ndikimi i rrjeteve sociale, duke ndaluar përdorimin e tyre për fëmijët nën moshën 15 vjeç, një masë që do të hyjë në fuqi nga 1 janari 2027.
Lajmi u bë i ditur nga kryeministri Kyriakos Mitsotakis, i cili theksoi se vendimi vjen si përgjigje ndaj rritjes së problemeve psikologjike tek të rinjtë, përfshirë ankthin, pagjumësinë dhe varësinë nga platformat digjitale.
Në një mesazh të drejtuar të rinjve, Mitsotakis u shpreh se orët e gjata përpara ekranit po ndikojnë negativisht në zhvillimin e tyre, duke i ekspozuar ndaj presionit të vazhdueshëm nga krahasimet dhe komentet online.
Ky vendim e vendos Greqinë në një linjë me disa vende evropiane që po shtrëngojnë rregullat për përdorimin e rrjeteve sociale nga të miturit, ndërsa shqetësimet për ndikimin e tyre në shëndetin mendor dhe social po rriten në gjithë botën.
Ndërsa Shqipëria vijon të mos ketë asnjë politikë konkrete për kufizimin apo rregullimin e përdorimit të rrjeteve sociale nga fëmijët dhe adoleshentët, pavarësisht rritjes së dukshme të problemeve si varësia nga ekrani, bullizmi online dhe ekspozimi ndaj përmbajtjeve të papërshtatshme.
Ndërsa vendet e rajonit dhe më gjerë po ndërhyjnë për të mbrojtur mirëqenien e brezit të ri, në Shqipëri debati mbetet pothuajse inekzistent në nivel institucional, duke lënë përgjegjësinë kryesisht tek familjet dhe individët.
Vendimi i Athinës pritet të hapë një diskutim më të gjerë në rajon për mënyrën se si shtetet duhet të balancojnë lirinë digjitale me mbrojtjen e shëndetit mendor të të rinjve, në një kohë kur teknologjia po ndikon gjithnjë e më shumë në jetën e përditshme.
