Një zhvillim i rëndësishëm në fushën e mjekësisë vjen nga Italia, ku studiuesit kanë krijuar një mekanizёm të ri që mund të parashikojë me saktësi se cilët persona do të preken nga Alzheimer brenda tre viteve.
Ky sistem është zhvilluar në kuadër të projektit “Interceptor”, i drejtuar nga neurologu Paolo Maria Rossini dhe në bashkëpunim me disa nga institucionet më të rëndësishme shëndetësore dhe kërkimore në Itali. Projekti është mbështetur nga Ministria e Shëndetësisë, ndërsa rezultatet janë publikuar në revistën shkencore Alzheimer’s & Dementia.
Mjeti i ri përdor algoritme dhe analiza të avancuara për të studiuar personat që kanë tashmë një problem të lehtë me kujtesën apo përqendrimin, i njohur si dëmtim i lehtë njohës (MCI). Kjo është një gjendje që shpesh shihet si fazë e ndërmjetme mes plakjes normale dhe demencës.
Studimi përfshiu mbi 350 persona me këtë gjendje, të cilët u ndoqën për rreth tre vite në 19 qendra të ndryshme në Itali. Rezultatet treguan se rreth 29.6% e tyre zhvilluan një formë demence, ndërsa 22.4% konkretisht u diagnostikuan me Alzheimer.
Përmes analizës së të dhënave, studiuesit ndërtuan një model që merr parasysh faktorë të ndryshëm, si shenjat biologjike të sëmundjes në tru dhe elementë gjenetikë si gjenotipi APOE. Në këtë mënyrë, sistemi është në gjendje të japë një vlerësim të personalizuar për çdo pacient, duke treguar nëse ai ka rrezik të ulët, të mesëm apo të lartë për të zhvilluar Alzheimer brenda tre viteve.
Ky zbulim është shumë i rëndësishëm sepse jo të gjithë personat me dëmtim të lehtë njohës përfundojnë duke zhvilluar sëmundjen. Rreth gjysma e tyre vazhdojnë jetën normalisht, pa përkeqësim të gjendjes. Pikërisht për këtë arsye, identifikimi i atyre që janë realisht në rrezik është thelbësor.
Në praktikë, ky mjet mund të ndihmojë mjekët të ndërhyjnë më herët, të ndjekin më nga afër pacientët në rrezik dhe të zgjedhin më saktë trajtimet. Në të ardhmen, ai mund të përdoret edhe për të vendosur se cilët pacientë duhet të përfitojnë nga terapitë e reja që po zhvillohen për Alzheimerin.
Ky zhvillim shënon një hap të rëndësishëm drejt diagnostikimit të hershëm dhe parandalimit të një prej sëmundjeve më të përhapura dhe më të rënda të kohës sonë.
(Burimi: ANSA)
