Një studim i ri shkencor sugjeron se martesa mund të ketë një ndikim të rëndësishëm në shëndet, duke u lidhur me një rrezik më të ulët për zhvillimin e kancerit. Sipas kërkimit të publikuar në Cancer Research Communications, personat që nuk janë martuar kurrë kanë një incidencë dukshëm më të lartë të kancerit krahasuar me ata që kanë qenë të martuar.
Të dhënat tregojnë se burrat që nuk janë martuar kurrë kanë rreth 68% më shumë gjasa të preken nga kanceri, ndërsa për gratë kjo përqindje rritet deri në 83%. Ky është një rezultat që ka tërhequr vëmendjen e studiuesve, pasi në shumë raste mendohej se burrat përfitonin më shumë nga martesa sesa gratë.
Sipas ekspertëve, shpjegimi nuk është i thjeshtë dhe lidhet me disa faktorë. Një prej tyre është mbështetja sociale që ofron martesa. Personat e martuar kanë më shumë gjasa të kujdesen për shëndetin e tyre, të bëjnë kontrolle mjekësore në kohë dhe të shmangin sjelljet e rrezikshme si duhani apo konsumimi i tepruar i alkoolit.
Gjithashtu, në disa raste ndikojnë edhe faktorë biologjikë. Për shembull, gratë që nuk kanë lindur fëmijë kanë rrezik më të lartë për disa lloje kanceri, si ai i vezoreve apo i mitrës.
Studiuesit theksojnë se efekti i martesës duket se rritet me kalimin e viteve, sidomos tek personat më të moshuar, çka tregon se përfitimet mund të “grumbullohen” me kohën.
Megjithatë, jo të gjithë ekspertët bien dakord se martesa në vetvete është arsyeja kryesore. Disa argumentojnë se sistemi shoqëror favorizon personat e martuar, për shembull në aksesin ndaj sigurimeve shëndetësore apo mbështetjes institucionale, duke krijuar kështu një avantazh artificial.
Një tjetër aspekt i rëndësishëm është izolimi social. Personat që jetojnë vetëm kanë më pak gjasa të kërkojnë ndihmë mjekësore në kohë ose të ndjekin trajtime të rregullta, gjë që mund të ndikojë në përkeqësimin e gjendjes shëndetësore.
Ekspertët theksojnë se zgjidhja nuk është domosdoshmërisht martesa, por krijimi i një rrjeti të fortë mbështetjeje. Miqtë, familjarët apo edhe komuniteti mund të luajnë një rol po aq të rëndësishëm në kujdesin dhe mirëqenien e individit.
Aështë martesa ajo që përmirëson shëndetin, apo thjesht njerëzit me kushte më të mira jetese dhe mbështetje kanë më shumë gjasa të martohen? Përgjigjja mbetet komplekse, por një gjë është e qartë – askush nuk duhet të përballet vetëm me sfida të mëdha si kanceri.
(Burimi:: CNN)
