Partia e ekstremit të djathtë Alternative for Germany (AfD) ka miratuar një manifest të ri të cilësuar si “radikal” përpara zgjedhjeve kyçe në shtetin lindor të Saxony-Anhalt, ku sondazhet e nxjerrin si forcë kryesore dhe potencialisht në prag të një shumice të plotë.
Nëse kjo ndodh, do të ishte hera e parë që një parti e ekstremit të djathtë merr pushtetin në një land gjerman që nga përfundimi i Luftёs sё II-tё Botёrore.
Programi, i miratuar në një konferencë në Magdeburg, përmban mbi 150 faqe dhe parashikon ndryshime të thella në politikën e emigracionit, ekonomisë dhe marrëdhënieve ndërkombëtare. Kandidati kryesor i AfD-së në këtë land, Ulrich Siegmund, e cilësoi momentin si historik, duke deklaruar se “e gjithë Gjermania dhe pjesë të botës po i ndjekin këto zgjedhje”, pasi sipas tij ato mund të sjellin një “kthesë politike”.
Manifesti vendos në qendër një linjë të ashpër kundër emigracionit, duke kërkuar deportime të vazhdueshme dhe atë që partia e quan “rimigrim” – kthimin e njerëzve me origjinë jo-gjermane në vendet e tyre. Në dokument përfshihet edhe thirrja për të ndalur njohjen e ukrainasve si refugjatë lufte dhe për t’i kthyer ata në Ukrainë.
Një tjetër element i fortë është orientimi pro-rus, me kritika të hapura ndaj politikave të qeverisë federale dhe kërkesa për heqjen e sanksioneve energjetike ndaj Rusisё, si dhe për forcimin e mësimit të gjuhës ruse në shkolla.
Në planin social, AfD propozon mbështetje të fortë për familjet e mëdha me origjinë gjermane, duke ofruar lehtësime tatimore dhe kujdes falas për fëmijët. Partia promovon një model tradicional të familjes – “një baba, një nënë dhe sa më shumë fëmijë të jetë e mundur” – dhe lidh rënien e lindshmërisë me atë që e quan “devijim seksual dhe stil jetese jo-riprodhues”. Po ashtu, ajo planifikon ndalimin e flamujve të komunitetit LGBTQ+ në shkolla.
Këto qëndrime kanë shkaktuar reagime të forta. Eva von Angern nga partia e majtë Die Linke e cilësoi programin si një “skenar makthi për demokracinë”, duke paralajmëruar për rrezikun e një shteti autoritar që kufizon të drejtat themelore.
AfD ka fituar terren në gjithë Gjermaninë vitet e fundit, duke u renditur e dyta në zgjedhjet federale të fundit me mbi 20% të votave dhe 152 vende në parlament. Degët e saj në disa lande, përfshirë Saksoni-Anhaltin, janë klasifikuar si “ekstremiste të djathta” nga autoritetet gjermane.
Vëzhguesit e shohin këtë manifest si një tregues të qartë të drejtimit që partia mund të ndjekë nëse arrin pushtet më të gjerë, duke e kthyer këtë garë zgjedhore në një test të rëndësishëm për të ardhmen politike të Gjermanisë.
(Burimi: Reuters/BBC)
