Çmimi i arit ka shënuar një rritje të fortë, duke kaluar mbi 4,840 dollarë për ons, niveli më i lartë në katër javët e fundit. Kjo lëvizje erdhi si reagim i drejtpërdrejtë ndaj shpresave se bisedimet mes ShBA dhe Iranit do të vazhdojnë, duke zbutur frikën për një krizë të zgjatur energjetike në Lindjen e Mesme.
Ari u rrit me më shumë se 2.1% gjatë ditës së martë, duke arritur nivelin më të lartë që nga 18 marsi, kur tregtohej rreth 4,845 dollarë për ons. Kjo rritje vjen pas një periudhe luhatjesh të forta, ku tensionet në rajon e kishin shtyrë çmimin deri në 4,099.52 dollarë për ons, niveli më i ulët që nga nëntori i kaluar.
Ndryshimi i menjëhershëm në tregje lidhet me sinjalet e reja diplomatike. Presidenti amerikan Donald Trump deklaroi se negociatat me Iranin mund të rifillojnë brenda dy ditësh në Islamabad, duke lënë të kuptohet se dialogu nuk është ndërprerë përfundimisht, pavarësisht mungesës së një marrëveshjeje në raundin e fundit.
Ai sugjeroi se zhvillime konkrete mund të ndodhin shumë shpejt dhe vlerësoi rolin e Pakistanit, veçanërisht të Asim Munir, në përpjekjet për ndërmjetësim.
Nga ana tjetër, zëvendëspresidenti amerikan JD Vance u shpreh se bisedimet kanë bërë “progres të madh”, por paralajmëroi se SHBA pret hapa konkretë nga Teherani, veçanërisht në lidhje me hapjen e Ngushticës së Hormuzit – një arterie kyçe për furnizimin global me energji. Sipas tij, dështimi në këtë drejtim mund të ndryshojë rrënjësisht dinamikën e negociatave.
Bisedimet direkte mes dy vendeve u zhvilluan gjatë fundjavës në Islamabad, por përfunduan pa një marrëveshje përfundimtare. Ato pasuan një armëpushim dyjavor të shpallur më herët gjatë muajit.
Reagimi i tregut të arit tregon qartë se investitorët janë jashtëzakonisht të ndjeshëm ndaj çdo sinjali diplomatik në një rajon kaq strategjik. Edhe një hap i vogël drejt dialogut mund të ndikojë ndjeshëm në pritshmëritë për furnizimin me energji dhe, si rrjedhojë, në çmimet globale.
(Burimi: AA)
