Kriza e sigurisë ushqimore në industrinë e qumështit për foshnja po merr përmasa globale. Gjiganti francez Lactalis ka njoftuar tërheqjen urgjente të disa serive të qumështit artificial për bebe në 18 vende, pas zbulimit të mundshëm të toksinës cereulide, një substancë bakteriale që mund të shkaktojë të vjella dhe diarre tek foshnjat.
Bëhet fjalë për gjashtë lote të markës Picot, të shpërndara në farmaci dhe supermarkete në vende nga Evropa deri në Azi dhe Amerikën Latine. Kompania tha se masa është parandaluese, ndërsa autoritetet shëndetësore po monitorojnë situatën.
Kjo është tёrheqja e tretё e madhe brenda pak javësh në industrinë e formulave për foshnja. Më herët, Nestlé dhe Danone ndërmorën masa të ngjashme për shkak të dyshimeve për të njëjtën toksinë.
Hetimet në Francë vijojnë edhe pas raportimit të vdekjes së një foshnje që kishte konsumuar një nga lotet e tërhequra nga Nestlé – pa u konfirmuar ende lidhje shkakësore.
Edhe Shqipëria u prek nga vala e tërheqjeve
Pas alarmit ndërkombëtar për Nestlé, edhe në Shqipëri disa seri të formulës për bebe janë tërhequr nga tregu, konkretisht nga rrjeti i farmacive dhe dyqaneve Rossmann & Lala, në bashkëpunim me importuesit dhe autoritetet përgjegjëse. Masa u mor si procedurë parandaluese për të shmangur çdo rrezik të mundshëm për shëndetin e foshnjave.
Autoritetet shqiptare nuk kanë raportuar raste të dëmtimit shëndetësor, por prindërit janë këshilluar të kontrollojnë numrat e lotit dhe të kthejnë produktet e përfshira në njoftimet e tërheqjes.
Rasti Lactalis – pas Nestlés dhe Danone – po ngre shqetësime serioze mbi kontrollin e zinxhirit të furnizimit në produktet më të ndjeshme të tregut: ushqimin e foshnjave. Sa e sigurt është ajo që u japim për të ngrënë më të vegjëlve?
(Burimi: France24 / AFP / Reuters)
