Për herë të parë, drejtuesja e institucionit që duhet të ruajë sekretet më të ndjeshme të shtetit shqiptar përfundon vetë nën masë sigurie. SPAK ka siguruar masën “arrest në shtëpi” dhe pezullimin nga detyra për drejtoreshën e SHISH, Vlora Hyseni, në kuadër të hetimeve që e lidhin me dosjen e AKSHI-t.
Hyseni nuk është një zyrtare çfarëdo. Prej prillit 2023 ajo drejton shërbimin sekret shqiptar, institucionin ku përfundojnë informacione të klasifikuara për kërcënimet ndaj vendit, terrorizmin, krimin e organizuar, ndërhyrjet e huaja dhe informacionet që shkëmbehen me shërbimet partnere.
Mëngjesin e sotëm, ndërsa zhvilloheshin kontrolle në kuadër të operacionit, mediat raportuan se Hyseni nuk ishte gjetur në banesë. Në të njëjtin aksion, me urdhër të GJKKO-së, janë raportuar kontrolle edhe në banesën e ish-drejtorit të Përgjithshëm të Policisë, Ilir Proda.
Tashmë kjo çështje është më shumë se fati personal i drejtueses së SHISH. Mbetet për t’u parë nga reagimi zyrtar se çfarë dyshon konkretisht SPAK se ka bërë Vlora Hyseni? A ka pasur informacion të klasifikuar të ekspozuar apo të përdorur jashtë kanaleve zyrtare? Dhe, nëse po, deri ku e në duart e kujt ka mbërritur?
Sot fakti i rëndë është se gruaja që kishte në tavolinë sekretet e Shqipërisë është vetë nën masë sigurie dhe është nxjerrë jashtë institucionit që drejtonte.
