Tenisti spanjoll Carlos Alcaraz ka shkruar historinë e sportit duke fituar Australian Open 2026 dhe duke u bërë lojtari më i ri që kompleton “Career Grand Slam”, pasi triumfoi ndaj legjendës serbe Novak Djokovic në finale.
22-vjeçari përmbysi humbjen e setit të parë për të siguruar fitoren me rezultatin 2-6, 6-2, 6-3, 7-5 në arenën Rod Laver Arena në Melburn. Me këtë sukses, ai i mohoi Djokovic mundësinë për t’u bërë lojtari i vetëm me 25 tituj Grand Slam.
Alcaraz pranoi pas ndeshjes se “këmbët po më dridheshin” kur shërbeu për titullin, por me kalimin e kohës ai mori kontrollin e lojës dhe e mbylli finalen pas tre orësh e dy minutash.
Ky trofe i shtohet dy titujve të tij në French Open, dy në Wimbledon Championships dhe dy në US Open, duke e çuar në shtatë numrin total të trofeve Grand Slam — një rekord për moshën e tij.
Në rrugën drejt kësaj arritjeje, ai ia kaloi edhe idhullit e bashkëkombësit të tij Rafael Nadal, i cili e kishte realizuar këtë objektiv dy vite më vonë në karrierë dhe po e ndiqte finalen nga tribuna.
Për Djokovic, 10 herë kampion në Australi, kjo ishte humbja e parë në një finale në Melburn, duke e lënë ende në kërkim të titullit të 25-të.
Një finale e denjë për historinë
Serbi e nisi më mirë ndeshjen, duke thyer dy herë shërbimin e rivalit dhe duke marrë setin e parë në vetëm 33 minuta. Por reagimi i Alcaraz ishte i menjëhershëm — me shpejtësi, fuqi dhe saktësi ai barazoi setet dhe më pas mori kontrollin e lojës.
Seti i tretë solli disa nga pikët më spektakolare të finales, ndërsa në të katërtin Djokovic luftoi fort për të qëndruar në ndeshje. Megjithatë, spanjolli e konsumoi gradualisht kundërshtarin dhe e mbylli takimin me gjakftohtësi.
Pas ndeshjes, Djokovic u tregua sportiv, duke e përgëzuar rivalin në një moment që u interpretua si simbolik — një lloj “kalimi i stafetës” mes dy epokave të tenisit.
“Do të thotë gjithçka për mua”
“It means the world to me,” tha Alcaraz, duke theksuar se ky triumf është rezultat i punës së palodhur. Me shtatë tituj, ai barazohet me legjenda si John McEnroe dhe Mats Wilander, ndërsa ndodhet vetëm një titull pas Andre Agassi, Jimmy Connors dhe Ivan Lendl.
Megjithatë, kampioni i ri shmangu krahasimet me Nadal dhe Djokovic, duke pranuar se shifrat e tyre — mbi 20 tituj — duken ende shumë larg. “E di sa e vështirë është të fitosh një Grand Slam. Dua vetëm t’i shijoj këto momente dhe të vazhdoj të punoj për t’i përjetuar sërish,” u shpreh ai.
Nga ana tjetër, Djokovic la të hapur të ardhmen e tij, duke thënë se nuk është i sigurt nëse do të rikthehet vitin e ardhshëm në Australi. “Zoti e di çfarë sjell e nesërmja. Ka qenë një rrugëtim i jashtëzakonshëm,” deklaroi ai.
Triumfi i Alcaraz jo vetëm që konfirmon dominimin e tij si numri një në botë, por edhe sinjalizon fillimin e një epoke të re në tenis.
