Liam Conejos Ramos, një djalë vetëm 5 vjeç, i arrestuar nga agjentët e emigracionit në Minneapolis gjatë një operacioni ku u ndalua edhe babai i tij, do të lirohet menjëherë me urdhër gjykate. Fëmija ishte marrë ndërsa po kthehej në shtëpi nga çerdhja, me një çantë shpine Spider-Man dhe një kapele blu të ndezur — një imazh që u përhap shpejt në rrjetet sociale dhe shkaktoi reagime të forta kundër veprimeve të autoriteteve amerikane të emigracionit.
Vendimi u mor nga gjykatësi i qarkut Fred Biery, i cili kritikoi ashpër qeverinë për mënyrën se si po zbaton politikat e deportimit. Sipas tij, rasti lidhet me “ndjekjen e keqmenduar dhe të zbatuar në mënyrë të paaftë të kuotave ditore të dëbimit, edhe nëse kjo do të thotë traumatizim i fëmijëve”.
Deklarata vjen në një kohë kur, sipas Stephen Miller, shef i strategjive politike në Shtëpinë e Bardhë, objektivi i administratës është të arrijë deri në 3,000 arrestime në ditë.
Në arsyetimin e vendimit, gjykatësi shkoi edhe më tej duke thënë se “injoranca e qeverisë ndaj një dokumenti historik amerikan të quajtur Deklarata e Pavarësisë është e dukshme”, duke e krahasuar sjelljen e administratës Trump me atë të monarkëve britanikë që shtynë Thomas Jefferson të hartonte dokumentin themelues të SHBA-së.
Urdhri i lirimit mbyllet me një citim biblik: “Lërini fëmijët e vegjël të vijnë tek unë dhe mos i pengoni, sepse mbretëria e qiejve u përket të tillëve”. Vetëm pak ditë më parë, i njëjti gjykatës kishte pezulluar edhe dëbimin e Liamit dhe babait të tij nga Shtetet e Bashkuara.
(Burimi: TGCOM)
