Një grua angleze (41 vjeç) i drejtohet një psikologeje shumë e dërrmuar nga një ngjarje shokuese në jetën e saj. Kuptoi se bashkëshorti e kishte tradhtuar, por më e rënda ishte mundësia që nga tradhtia të kishte një fëmijë…
Gruaja i thotë psikologes:
“Bashkëshorti im sapo më ka bërë një rrëfim që më ka tronditur plotësisht. Ai pranoi se gjashtë vite më parë ka pasur një lidhje jashtëmartesore dhe se, si pasojë e saj, mund të jetë bërë baba Më tha se kishte pasur një aventurë që nuk kishte pasur asnjë rëndësi për të, por gruaja me të cilën ishte lidhur kishte mbetur shtatzënë.
Sipas tij, vetëm kohët e fundit ka mësuar se fëmija mund të jetë i tij. Ajo grua ishte e martuar dhe ia kishte paraqitur fëmijën bashkëshortit të saj si të tijin. Por unë mendoj se martesa e tyre është shkatërruar kur ai ka zbuluar se nuk ishte babai biologjik i fëmijës. Tani ajo ka kontaktuar bashkëshortin tim dhe i ka kërkuar të bëjë një test ADN-je për të vërtetuar atësinë.
E gjithë kjo situatë është kthyer në një rrëmujë të tmerrshme. Bashkëshorti im është 43 vjeç, ndërsa unë jam 41. Kemi tre djem të vegjël. Jam jashtëzakonisht e zemëruar.Gjatë martesës sonë kemi pasur ulje-ngritjet tona dhe ai gjithmonë ka pasur prirjen t’i hedhë sytë nga gratë e tjera.
Por si mund ta përballojmë tani gjithë këtë situatë? Si mund ta rregullojmë martesën tonë dhe si t’u themi tre djemve tanë se mund të kenë një motër të vogël?”
Në përgjigjen e saj, psikologia e konsideron të kuptueshëm zemërimin e gruas, duke theksuar se një zbulim i tillë mund të tronditë rëndë ekuilibrin e një familjeje.
Megjithatë, ajo sugjeron që përpara çdo vendimi të sqarohet fillimisht e vërteta për atësinë e fëmijës, përmes një testi ADN-je. Nëse rezulton se vajza është biologjikisht e bashkëshortit, ai duhet të marrë përgjegjësinë për të vendosur se çfarë roli do të ketë në jetën dhe rritjen e saj.
Psikologia i rekomandon gjithashtu çiftit të kërkojë ndihmë profesionale për të përballuar krizën martesore, pa lejuar që zemërimi dhe konfliktet mes tyre të ndikojnë te tre djemtë.
Sipas saj, nëse konfirmohet se fëmijët kanë një motër, mënyra se si ata do ta përjetojnë këtë të vërtetë do të varet në një masë të madhe nga qëndrimi i prindërve. Për këtë arsye, ajo këshillon bashkëshortët të përpiqen të rikthejnë stabilitetin në marrëdhënien e tyre, përpara se t’ua komunikojnë fëmijëve një lajm kaq delikat.
Burimi: The Sun
