Përdoruesit e Google Maps u zgjuan këto ditë me një surprizë të pazakontë: segmenti Thumanë–Kashar i autostradës A1 shfaqet i pagëzuar si “Autostrada ‘Nderi i jetës’”. Një emër që nuk gjendet në asnjë dokument zyrtar, por që – çuditërisht – qarkullon në hartën më të përdorur në botë.
Nuk bëhet fjalë për një “gabim teknik”, por për një tallje që lidhet me akuzat e rënda për korrupsion për ndërtimin e segmentit Thumanë-Kashar.
Fraza “Nderi i jetës” i referohet përgjimeve të SPAK në dosjen Balluku, kur ajo mes mesazheve që shkëmben me drejtorin e rrugëve Evis Berberi shkruan për biznesmenin Bashkim Ulaj se i “ka bërë nderin e jetës”, në diskutimet pikërisht për tenderin e këtij segmenti rrugor.
Ja çfarë shkruan në dosje SPAK:
“Komunikimi i referohet shtetasit Bashkim Ulaj, ortak i shoqërisë “Gener 2” sh.p.k., e shpallur fituese në procedurën koncesionare “Për dhënien me koncesion/PPP të ndërtimit dhe mirëmbajtjes së rrugës Thumanë–Fushë-Krujë–Vorë–Kashar”, ku vlera e parashikuar e projektit është 245 milion e 750 mijë euro.
Belinda Balluku: Isha me Bashkimin dje.
Evis Berberi: Si shkoi?
Belinda Balluku: Dhe i thash kjo është sfida ime dhe e tij.
Evis Berberi: Po prandaj ndihej ndryshimi sot.
Belinda Balluku: Më tha që vinçi për trarët e urës vjen nesër ose pasnesër Evis.
Evis Berberi: Erdhi dje, sot shkonte te ura. Se që andej po kthehem.
Belinda Balluku: Unë po i bëj nderin e jetës me Thumanë-Kashar, ndaj ai do bëhet copë. Do flasim pak, mund të bëhet shumë ushtar. Është shumë i izoluar dhe i pashpresë, ndaj Agollin nuk e shiti kurrë dhe e bëri mbret.
Evis Berberi: Të vij sot të diskutojmë pak dhe për nesër në ora 9. S’ka se si ta shesë kanë punuar gjatë.
Belinda Balluku: Se këta të tjerët janë të lidhur e të bërë gonxhe me njeri tjetrin.“
A është vallë Google Maps viktimë e një shakaje kolektive? Apo kemi të bëjmë me një protestë simbolike që përdor hartën si pankartë?
Google lejon raportime dhe sugjerime nga përdoruesit – gjë që e bën të mundur ndryshimin e përkohshëm të emrave derisa të verifikohen.
Deri atëherë, “Autostrada ‘Nderi i jetës’” do mbetet me këtë emërtim sarkastik, një pasqyrë e realitetit shqiptar.
A po tallen njerëzit me korrupsionin, apo nëpërmjet Google, “shoferëve” po u jepet një mesazh nga Amerika?
