Udhëheqësi i Koresë së Veriut, Kim Jong-un, ka përshëndetur trupat koreano-veriore që po luftojnë jashtë vendit, duke i cilësuar si themelues të një “aleance të pathyeshme” me Rusinë, në mesazhin e tij të Vitit të Ri, raportuan mediat shtetërore në Phenian.
Sipas agjencisë shtetërore KCNA, Kim vlerësoi ushtarët që po luftojnë në atë që ai e quajti “tokë e huaj”, duke i përgëzuar për mbrojtjen “heroike” të nderit kombëtar dhe duke i nxitur të tregohen të guximshëm. “Ndërsa i gjithë vendi është përfshirë nga atmosfera festive e Vitit të Ri, ju ndiej edhe më pranë, ju që po luftoni me trimëri në fushëbetejat e huaja”, citohet të ketë thënë ai.
Autoritetet e Koresë së Jugut dhe shërbimet perëndimore të inteligjencës thonë se mijëra trupa nga Koreja e Veriut janë dërguar për të mbështetur pushtimin rus të Ukrainës, tashmë në vitin e tij të katërt. Një pjesë e tyre u dislokuan në rajonin rus të Kurskut në vitin 2024, për të zmbrapsur një inkursion të forcave ukrainase, që më pas dështoi. Pheniani ka pranuar gjithashtu se ka dërguar inxhinierë luftarakë për pastrimin e minave në zonë.
Sipas vlerësimeve të inteligjencës së Koresë së Jugut, të cilat nuk janë verifikuar në mënyrë të pavarur, të paktën 600 ushtarë koreano-veriorë kanë humbur jetën dhe mijëra të tjerë janë plagosur. Përveç trupave, Pheniani ka furnizuar Moskën edhe me predha artilerie, raketa dhe sisteme raketore me rreze të gjatë veprimi.
Analistët vlerësojnë se në këmbim të këtij mbështetjeje ushtarake, Koreja e Veriut po përfiton ndihmë financiare, teknologji ushtarake, si dhe furnizime me ushqim dhe energji nga Rusia.
Në mesazhin e tij, Kim theksoi se pas trupave “qëndrojnë Pheniani dhe Moska”, duke i bërë thirrje ushtarëve të luftojnë “për popullin vëllazëror rus”. Ai la të kuptohet gjithashtu se angazhime të tjera ushtarake jashtë vendit mund të pasojnë gjatë vitit 2026, duke përmendur “bëmat e jashtëzakonshme” që, sipas tij, trupat koreano-veriore do të kryejnë në fushëbeteja të huaja.
Kim e shënoi Vitin e Ri me një ceremoni madhështore dhe një shfaqje festive në stadiumin May Day në Phenian. Pamjet e publikuara nga KCNA treguan se ai shoqërohej nga bashkëshortja e tij Ri Sol Ju dhe vajza Kim Ju Ae, e cila konsiderohet nga analistët si pasardhësja e mundshme e tij.
Ekspertët theksojnë se afrimi me Rusinë i ka dhënë regjimit të Kim Jong-un-it një linjë shpëtimi ekonomike dhe politike, duke i mundësuar atij të refuzojë përpjekjet e SHBA-ve dhe Koresë së Jugut për dialog. Sipas profesorit Lim Eul-chul nga Universiteti Kyungnam, dërgimi i trupave jashtë vendit nuk është më një përjashtim, por po shndërrohet në pjesë të politikës zyrtare të mbrojtjes së Koresë së Veriut.
Megjithatë, dëshmitë nga terreni – përfshirë rrëfimet e ushtarëve të plagosur të kapur nga Ukraina – përshkruajnë një realitet shumë më të ashpër për trupat koreano-veriore, të përfshira në konfliktin më të përgjakshëm që ka parë Evropa në dekada.
(Burimi: France 24 dhe AFP)
