Çmimet e avionëve privatë në Dubai janё shtrenjtuar shumё, ndërsa turistë të pasur përpiqen të largohen me çdo kusht nga Emiratet e Bashkuara Arabe pas mbylljes së aeroporteve për shkak të sulmeve iraniane në rajon.
Mijëra fluturime në të gjithë Lindjen e Mesme janë anuluar që prej fundjavës, duke lënë qindra mijëra pasagjerë të bllokuar, ndërsa përplasjet mes SHBA-ve, Izraelit dhe Iranit kanë shkaktuar kaos në trafikun ajror global. Sulmet me raketa dhe dronë të Iranit çuan në mbylljen e Aeroportit Ndërkombëtar të Dubait dhe atij Al Maktoum të shtunën.
Autoritetet në Dubai njoftuan se një numër i kufizuar fluturimesh do të rifillojnë gradualisht, por për shumë turistë ky lajm ka ardhur tepër vonë. Sipas raportimeve, disa prej tyre kanë paguar më shumë se 100 mijë paund për të siguruar një avion privat, ndërsa të tjerë kanë udhëtuar deri në 10 orë me makinë për të arritur në aeroporte ende funksionalё në Oman apo Arabinë Saudite.
Kërkesa për avionë privatë është rritur ndjeshëm, në një kohë kur operatorët janë më të kujdesshëm për të fluturuar në rajon. Përfaqësues të industrisë së charterave ajrorё kanë bërë të ditur se shumë avionë privatë lokalë janë bllokuar në aeroporte të mbyllura, duke detyruar kompanitë të sjellin mjete nga vende më të largëta – faktor që ka rritur ndjeshëm kostot.
Fluturimet me avionë të vegjël nga Muscat drejt Stambollit kanë kapur çmime mbi 70 mijë paund, pothuajse dyfish i tarifës normale, ndërsa avionët më të mëdhenj kanë shkuar deri në 105 mijë paund. Destinacionet kryesore nga Dubai kanё qёnё Stambolli, Londra dhe Roma.
Ndërkohë, kompani private sigurie kanë ofruar transport me automjete të blinduara për klientët që kërkojnë të arrijnë aeroporte alternative jashtë Emirateve.
Sipas të dhënave të shërbimit Flightradar24, më shumë se 4,000 fluturime në ditë janë anuluar në rajon që prej së shtunës. Megjithatë, disa fluturime të kufizuara janë realizuar. Një avion i Etihad Airways mbërriti në Londër mbrëmjen e së hënës, ndërsa fluturime të tjera janë nisur drejt Moskës, Parisit, Kajros, Delhit dhe Karachit.
Etihad ka bërë të ditur se disa fluturime për riatdhesim, transport mallrash apo ripozicionim avionësh mund të operojnë në koordinim me autoritetet e Emirateve dhe vetëm nëse plotësohen standardet e rrepta të sigurisë.
Kriza e fundit ka kthyer Dubain – një nga qendrat më të mëdha globale të turizmit dhe biznesit – në një pikë daljeje emergjente për ata që mund ta përballojnë koston, ndërsa mijëra të tjerë vijojnë të presin rifillimin e plotë të trafikut ajror.
(Burimi: Mirror)
