Në Vlorë, një nga bashkitë më të mëdha të vendit me 130.480 zgjedhës në 231 qendra votimi, sot votuan vetëm 18.039 qytetarë për të zgjedhur pasardhësin e Ermal Dredhës, i cili dha dorëheqjen në shtator.
Shifrat e nxjerra për votimet në këtë qytet nga KQZ, janë alarmante po të mbahet në konsideratë se, kreu i Bashkisë që nuk mund të ketë marrë 100% të votave të hedhura në kuti, do përfaqësojë vetëm 6,5 ose 7, 8 apo 9 përqind të vullnetit të banorëve të qytetit të madh jugor.
Në një qytet bregdetar dhe kyç për turizmin, ekonominë dhe rivierën shqiptare ky bojkotim lokal për të zgjedhur “menaxherin” më të mirë të fondeve publike lokale është një goditje e rëndë për sistemin politik në Shqipëri.
Mosbesimi në politikën e drejtimit përfshin pozitë dhe opozitë bashkë. Veçanërisht në Vlorë ku kjo u pasqyrua me rezultatin rekord të mospjesëmarrjes të të gjitha zgjedhjeve të zhvilluara deri sot.
Në katër bashkitë e tjera, edhe këto me përqindje minimaliste votimi, KQZ nxorri këtë rezultat pjesëmarrjeje:
Bashkia Berat – pjesëmarrja 19.81%
Bashkia Cërrik – pjesëmarrja 24.81%
Bashkia Mat – pjesëmarrja 39.23%
Bashkia Tepelenë – pjesëmarrja 34.63%
