Administrata e presidentit amerikan Donald Trump ka njoftuar se do të revokojë vizat e përkohshme të të huajve që kanë hyrë në Shtetet e Bashkuara si vizitorë dhe më pas kanë aplikuar për azil, një masë që mund të prekë deri në 200 mijë persona dhe, nëse zbatohet në këtë përmasë, do të përbënte revokimin më të madh të njëhershëm të vizave në historinë e SHBA-së.
Departamenti amerikan i Shtetit bëri të ditur të hënën se po bashkëpunon me Departamentin e Sigurisë Kombëtare për të identifikuar personat që kanë hyrë në vend me viza joemigruese, duke deklaruar se do të qëndronin përkohësisht, por që më pas kanë paraqitur kërkesë për azil me synimin për të qëndruar në SHBA.
“Po bashkëpunojmë me Departamentin e Sigurisë Kombëtare për të identifikuar dhe revokuar vizat joemigruese të të huajve që kanë ardhur në Shtetet e Bashkuara duke pretenduar se janë vizitorë afatshkurtër, por më pas kanë kërkuar azil për të qëndruar këtu përgjithmonë”, deklaroi një zëdhënës i Departamentit të Shtetit.
Autoritetet nuk dhanë një numër zyrtar të vizave që pritet të anulohen, por Associated Press, duke iu referuar dokumenteve të Departamentit të Shtetit dhe dy zyrtarëve amerikanë, raportoi se masa mund të prekë deri në 200 mijë të huaj.
Në shënjestër janë vizat B1 dhe B2 të lëshuara gjatë periudhës 2016-2026 për persona që më pas kanë kërkuar ose janë aktualisht në proces të kërkimit të azilit. Viza B1 përdoret kryesisht për udhëtime të përkohshme biznesi, ndërsa B2 për turizëm dhe vizita të tjera të përkohshme.
Heqja e vizës, megjithatë, nuk do të thotë domosdoshmërisht dëbim i menjëhershëm nga Shtetet e Bashkuara. Sipas AP-së, shumica e personave që kanë një çështje azili ende në shqyrtim do të riklasifikohen për sa i përket statusit të tyre, por nuk do të vazhdojnë të konsiderohen si vizitorë për biznes apo turizëm.
Masa është pjesë e politikës së gjerë të administratës Trump për shtrëngimin e sistemit amerikan të emigracionit. Vetëm pak orë përpara njoftimit, zëvendëssekretari amerikan i Shtetit, Christopher Landau, deklaroi se sistemi i emigracionit në SHBA “prej kohësh është mbingarkuar nga kërkesa të pabazuara për azil”.
Departamenti i Shtetit njoftoi gjithashtu më herët gjatë këtij muaji se, që nga rikthimi i Trump në Shtëpinë e Bardhë, administrata ka revokuar më shumë se 175 mijë viza të shtetasve të huaj.
Presidenti Trump ka ndërmarrë një sërë masash në fushën e emigracionit, që përfshijnë anulimin e vizave dhe kartave të gjelbra, si edhe një fushatë të gjerë dëbimesh. Ai argumenton se këto politika janë të nevojshme për forcimin e sigurisë së brendshme të Shteteve të Bashkuara.
Politika e administratës nuk është kufizuar vetëm te emigracioni i paligjshëm, megjithëse ndalimi i tij ishte një prej premtimeve kryesore të Trump gjatë fushatës presidenciale të vitit 2024. Qeveria ka shtrënguar edhe disa rrugë të emigracionit të ligjshëm, ndër të tjera duke vendosur tarifa të reja dhe më të larta për aplikantët e disa kategorive të vizave të punës.
Masat kanë shkaktuar kundërshtime dhe beteja gjyqësore. Organizatat për mbrojtjen e të drejtave të njeriut akuzojnë administratën se disa prej politikave të saj cenojnë të drejtën për një proces të rregullt ligjor dhe lirinë e shprehjes, ndërsa pjesëtarë të pakicave etnike kanë ngritur shqetësime për mundësinë e profilizimit racor.
Nëse shifra prej rreth 200 mijë vizash e raportuar nga Associated Press konfirmohet gjatë zbatimit të masës, operacioni do të shënojë revokimin më të madh masiv të vizave të ndërmarrë ndonjëherë nga autoritetet amerikane.
