Qeveria e Brazilit ka anuluar vizën e Darren Beattie, këshilltar i afёrt i presidentit amerikan Donald Trump, i cili kishte planifikuar të vizitonte ish-presidentin brazilian Jair Bolsonaro në burg në kryeqytetin Brasilia.
Presidenti brazilian Luiz Inacio Lula da Silva konfirmoi vendimin të premten, duke deklaruar se Beattie nuk do të lejohet të hyjë në Brazil për sa kohë që Shtetet e Bashkuara nuk rikthejnë vizën e ministrit brazilian të Shëndetësisë, Alexandre Padilha, e cila u anulua vitin e kaluar nga autoritetet amerikane.
“Ai amerikan që tha se do të vinte këtu për të vizituar Jair Bolsonaron u ndalua. Unë gjithashtu ndalova hyrjen e tij në Brazil derisa të rikthehet viza për ministrin tonë të shëndetësisë,” tha Lula gjatë një aktiviteti në Rio de Janeiro.
Zyrtarë brazilianë thanë për mediat se Beattie nuk kishte deklaruar saktë qëllimin e vizitës në aplikimin për vizë, duke dhënë informacion të pasaktë për arsyen e udhëtimit.
Ish-presidenti Jair Bolsonaro, një aleat i fortë i Donald Trump, po vuan aktualisht një dënim prej 27 vitesh burg për rolin e tij në një përpjekje për grusht shteti pas zgjedhjeve presidenciale të vitit 2022 në Brazil.
Vendimi për anulimin e vizës tregon se tensionet mes Brazilit dhe Shteteve të Bashkuara vazhdojnë, edhe pse marrëdhëniet personale mes Trump dhe Lula janë përmirësuar muajt e fundit.
Në gusht të vitit të kaluar, administrata Trump vendosi tarifa të larta ndaj produkteve braziliane, ndër më të lartat në botë, nё shenjё proteste ndaj ndjekjes penale tё Bolsonaros. Trump akuzoi gjithashtu autoritetet braziliane se po përndiqnin politikanët e djathtë.
Megjithatë, më vonë të dy liderët zhvilluan takime në Asamblenë e Përgjithshme të OKB-së dhe në një samit të ASEAN-it, ndërsa Trump zbuti pjesërisht tarifat ndaj disa produkteve braziliane si mishi i viçit dhe kafeja.
Situata mbetet e ndjeshme edhe për shkak të zgjedhjeve presidenciale që pritet të mbahen në tetor në Brazil, ku presidenti Lula do të përballet me Flavio Bolsonaron, djalin e madh të ish-presidentit.
Ndërkohë, vetë Jair Bolsonaro është shtruar në spital, pasi sipas mjekëve 70-vjeçari po përballet me temperaturë të lartë, ulje të nivelit të oksigjenit dhe simptoma të lidhura me pneumoninë.
(Burimi: Al Jazeera / AFP / Reuters)
