Zhvillime të reja hedhin dritë mbi prapaskenat e dorëheqjes së bujshme të Joe Kent, ish-drejtues i Qendrës Kombëtare Kundër Terrorizmit në SHBA, duke vendosur në qendër të vëmendjes edhe zëvendëspresidentin JD Vance dhe një takim me dyer të mbyllura që parapriu largimin e tij nga detyra. Para se të jepte dorëheqjen që tronditi administratën e Donald Trump, Kent ia kishte besuar privatisht vendimin dhe qëndrimin e tij kritik një prej aleatëve më të afërt politikë, JD Vance.
Sipas raportimeve, Kent – i njohur për qëndrimet e tij kundër ndërhyrjeve ushtarake dhe për lidhjet e afërta me Vance dhe Drejtoreshën e Inteligjencës Kombëtare, Tulsi Gabbard – i dorëzoi letrën e dorëheqjes zëvendëspresidentit rreth 24 orë përpara se ta bënte publike. Në këtë takim me dyer të mbyllura ishte e pranishme edhe Gabbard, çka e bën edhe më të ndjeshme situatën brenda kupolës së sigurisë amerikane.
Një zyrtar i Shtëpisë së Bardhë ka bërë të ditur se JD Vance e kishte inkurajuar Kentin që, përpara çdo vendimi përfundimtar, të komunikonte drejtpërdrejt me Presidentin Donald Trump dhe me shefen e stafit të Shtëpisë së Bardhë, Susie Wiles. Sipas të njëjtit burim, Vance i kishte kërkuar Kentit të tregonte “respekt ndaj Presidentit”, duke lënë të kuptohet se kishte tentuar të shmangte një përplasje të hapur.
Megjithatë, vetëm pak orë më pas, Kent publikoi një letër dorëheqjeje të ashpër dhe të pazakontë për standardet e administratës, ku jo vetëm refuzonte të mbështeste luftën me Iranin, por edhe akuzonte drejtpërdrejt ndikimin e Izraelit dhe lobit të tij në SHBA si faktor që, sipas tij, kishte shtyrë vendin drejt konfliktit. Ai deklaroi se nuk mund ta mbështeste “me ndërgjegje të pastër” këtë luftë, duke e cilësuar atë si të ndërtuar mbi premisa të gabuara dhe në kundërshtim me parimet e mosndërhyrjes për të cilat vetë Trump kishte bërë fushatë.
Ky zhvillim ngre pikëpyetje të forta mbi atë që ndodhi në orët para dorëheqjes: nëse JD Vance ishte në dijeni të toneve të ashpra të letrës dhe nëse ai apo figura të tjera të larta të administratës u paralajmëruan për goditjen publike që Kent do t’i jepte politikës së jashtme të Trump. Deri tani mbetet e paqartë nëse ky informacion është ndarë më gjerë brenda administratës apo nëse dorëheqja erdhi si një surprizë edhe për pjesën tjetër të ekipit qeverisës.
Në një moment kur SHBA është e përfshirë në një konflikt të rrezikshëm me Iranin, rasti Kent dhe roli i JD Vance nxjerrin në pah jo vetëm përplasjet mbi politikën e jashtme, por edhe tensionet e brendshme në nivelet më të larta të pushtetit amerikan, duke treguar se kriza nuk është vetëm në frontin ushtarak, por edhe në vetë zemrën e vendimmarrjes në Uashington.
(Burimi: Daily Mail)
