Nëse deri dje ChatGPT shihej si mjet i zyrtarëve, programuesve apo gazetarëve, sot po hyn në një terren të ri: punët e krahut. Nga hidraulikët te elektricistët, nga mekanikët te mjeshtrat e ndërtimit – shumë prej tyre po përdorin tashmë inteligjencën artificiale për t’u ndihmuar në punën e përditshme.
CNN shkruan se gjithnjë e më shumë zanatçinj po përdorin versionet më të fundit të ChatGPT për të llogaritur materiale, për të diagnostikuar probleme teknike apo për të përgatitur ofertat për klientët. Në vend që të mbajnë blloqe me shënime apo të kërkojnë manuale, ata i kërkojnë ndihmë aplikacionit që “flet si njeri” – dhe përgjigjja vjen menjëherë.
Në shumë raste, AI-ja po bëhet krahu i dytë i profesionistëve, jo për t’i zëvendësuar, por për t’u kursyer kohë. “Nuk kam nevojë të kërkoj më në dhjetë forume për një problem hidraulik – ChatGPT më jep tre mënyra zgjidhjeje në sekondë”, ka rrëfyer një instalues uji nga Kalifornia për CNN.
Por ndërsa për disa, kjo është lehtësi, për të tjerë është paralajmërim. Përdorimi i AI-së në zanate kërkon aftësi të reja – një kombinim i punës fizike dhe teknologjisë. Ata që nuk përshtaten mund të mbeten pas, sidomos brezat më të vjetër që ende nuk janë mësuar me ekranet dhe komandat virtuale.
Ekspertët e tregut të punës thonë se për herë të parë në dekada, teknologjia nuk po prek vetëm profesionet qё lidhen me punёn mendore, por edhe punët më tradicionale. “Në dekadën e ardhshme, mjeshtri më i kërkuar nuk do të jetë ai që punon më shpejt, por ai që di të punojë me inteligjencën artificiale”, shkruan analiza e CNN.
Në fund, nuk është se makinat po marrin vendin e njerëzve – por njeriu që di të përdorë makinat po merr vendin e atyre që nuk dinë. Dhe kjo, më shumë se çdo gjë tjetër, po shënon një epokë të re të punës blu: atë ku tornua, çekiçi dhe tableti ndajnë të njëjtёn tryezë.
(Burimi: CNN)
