Protesta kundër projektit në Zvërnec dhe politikave të qeverisë hyri sot në ditën e saj të 13-të, duke shënuar një tjetër mobilizim masiv në kryeqytet, ku protagonistë ishin kryesisht të rinjtë.
Qindra e mijëra qytetarë mbushën rrugët dhe sheshet kryesore të Tiranës, ndërsa grupe të shumta të rinjsh marshuan në pika të ndryshme të qytetit, duke krijuar një prani të vazhdueshme proteste në çdo cep të kryeqytetit. Nga Sheshi Skënderbej te Bulevardi “Dëshmorët e Kombit”, nga rrugët përreth institucioneve deri në unazën e qytetit, turma të shumta marshuan, brohoritën dhe mbajtën pankarta me mesazhe kundër qeverisë.
Pamjet e ditës së sotme treguan një pjesëmarrje që organizatorët e cilësuan si ndër më të mëdhatë që prej nisjes së lëvizjes. Shumë qytetarë ndoqën protestën nga ballkonet, lokalet dhe trotuaret, ndërsa të tjerë iu bashkuan spontanisht turmës gjatë marshimit.
Sipas pjesëmarrësve, ajo që po ndodh në rrugët e Tiranës nuk është vetëm një protestë për një çështje të caktuar, por një shprehje e pakënaqësisë së akumuluar ndër vite ndaj korrupsionit, emigrimit masiv, mungesës së mundësive dhe arrogancës së pushtetit.
Mes thirrjeve dhe duartrokitjeve që shoqëruan marshimin, një slogan u dëgjua më shumë se çdo tjetër:
“Revolucion!”
