Një sasi e madhe municionesh gjermane është vjedhur nga një kamion shpërndarjeje në qytetin lindor të Burgut, ka konfirmuar Ministria e Mbrojtjes së Gjermanisë. Zyrtarët, duke folur për agjencinë DPA, nuk dhanë saktësisht shifrën e municionit të marrë, por raportime të tjera citojnë një zëdhënës të mbrojtjes, sipas të cilit bëhet fjalë për rreth 20,000 fishekë.
Ngjarja mendohet të ketë ndodhur më 25 nëntor, pasi shoferi i një kompanie private transporti — e kontraktuar nga ushtria — e la kamionin gjatë natës në një parking të pambrojtur. Të nesërmen, kur ngarkesa mbërriti në kazermat Clausewitz aty pranë, u zbulua se municionet mungonin. Ushtria dhe policia gjermane kanë nisur menjëherë një hetim të përbashkët.
Sipas “Der Spiegel” dhe mediave të tjera gjermane, ngarkesa përmbante 10,000 fishekë për pistoleta, 9,900 fishekë të zbrazët për pushkë sulmisi dhegranata tymi. Autoritetet nuk kanë bërë ende të ditur nëse ka persona të arrestuar ose të identifikuar në lidhje me vjedhjen, e cila ka ngritur shqetësime për sigurinë dhe për mundësinë që municionet të përfundojnë në duar të rrezikshme.
“Ne e marrim shumë seriozisht këtë incident — ky lloj municioni nuk duhet të përfundojë në duar të gabuara,” deklaroi Ministria e Mbrojtjes për mediat vendase.
Një nga pikat kryesore të hetimit pritet të jetë pse shoferi nuk siguroi një vend të mbrojtur për të parkuar kamionin. Sipas transmetuesit publik gjerman MDR, ekziston një linjë telefonike e posaçme për shoferët që kërkojnë ndihmë për raste të tilla, madje Forcat e Armatosura mund të ofrojnë edhe eskortë kur nevojitet.
Ky është incidenti më i fundit në një seri humbjesh të ngjashme municioni në Saksoni-Anhalt. Në gusht, policia e Bernburg raportoi zhdukjen e 90 fishekëve, ndërsa pak javë më pas, oficerët në Eisleben raportuan humbjen e 180 fishekëve. Deri tani nuk ka prova që i lidhin këto raste mes tyre.
(Burime: Der Spiegel, BBC)
