Në Kanada, disa pankarta me mbishkrimet “Babagjyshi nuk është i vërtetë” dhe “Prindërit e tu janë Babagjyshi” kanë shkaktuar debat, zemërim dhe madje telefonata në polici, duke hapur sërish diskutimin e përjetshëm: A duhet t’u tregojmë fëmijëve të vërtetën apo t’i lëmë të shijojnë magjinë e festave?
Policia në qytetin Brantford të Ontario-s — rreth 103 km në perëndim të Torontos — konfirmoi se ka marrë disa telefonata nga banorë të indinjuar, pasi pankartat u shfaqën në dritaren e një shtëpie përgjatë itinerarit të paradës së Babagjyshit të fundjavës.
Sipas imazheve të shpërndara në rrjetet sociale, në dritare ishin vendosur katër tabela shumëngjyrëshe, ku dy prej tyre mbanin mbishkrimet:
“Babagjyshi nuk është i vërtetë” dhe “Dhuratat jua blen familja.”
Policia njoftoi se u kërkoi pronarëve t’i hiqnin tabelat, por sqaroi se ato nuk ishin të paligjshme — për shkak të lirisë së fjalës dhe faktit që ndodheshin në pronë private.
“Ndërsa nuk është e paligjshme të jesh ‘Grinç’, ne i inkurajojmë të gjithë të përqafojnë frymën festive dhe të ndihmojnë në krijimin e një komuniteti pozitiv, sidomos gjatë eventeve si Parada e Babagjyshit,” tha një zëdhënës i policisë.
Reagimet në rrjetet sociale ishin të përziera. Një përdorues e quajti veprimin “absolutisht të neveritshëm”, ndërsa të tjerë habiteshin që dikush kishte telefonuar policinë për një pankartë të tillë.
Parada e Babagjyshit në Brantford mbledh rreth 30,000 pjesëmarrës çdo vit, dhe është një nga aktivitetet më të dashura festive në qytet.
Nuk është hera e parë që “të vërtetat” për Babagjyshin shkaktojnë telashe.
Në Texas (2018), policia arrestoi një protestues që u thoshte fëmijëve se Babagjyshi nuk ekziston — ai refuzoi të largohej dhe u akuzua për hyrje pa leje.
Në Toronto (1979), Richard Dildy u arrestua për “trazira” pasi mbante një tabelë me mbishkrimin “Poshtë Babagjyshi!”. Ai u etiketua “Grinç” në gazetat lokale, por vetë u mbrojt duke thënë se po kërkonte që “njerëzit të ndalojnë së gënjyeri fëmijët e tyre”.
Ndodh edhe kështu…
(Burimi: BBC)
