Kina ka nisur stërvitje të gjera ushtarake rreth Tajvani, duke simuluar skenarë pushtimi dhe bllokade të zonave kyçe të ishullit, në atë që Pekini e përshkruan si një paralajmërim të drejtpërdrejtë kundër “forcave separatiste”.
Ushtria kineze njoftoi se në stërvitjet, të koduara me emrin “Misioni i Drejtësisë 2025”, janë përfshirë forcat tokësore, marina, forcat ajrore dhe njësitë raketore, përfshirë edhe ushtrime me armë zjarri. Sipas Komandës së Teatrit Lindor, përgjegjëse për Ngushticën e Tajvanit, manovrat synojnë të testojnë aftësitë luftarake dhe të dërgojnë një “sinjal të fortë” kundër çdo përpjekjeje për pavarësi.
Stërvitjet vijnë vetëm disa ditë pasi Shtetet e Bashkuara njoftuan një paketë të re shitjeje armësh për Tajvanin, me vlerë rreth 11 miliardë dollarë, një hap që shkaktoi reagim të ashpër nga Pekini. Si kundërpërgjigje, Kina vendosi sanksione ndaj disa kompanive amerikane të mbrojtjes.
Autoritetet në Tajvan i kanë dënuar stërvitjet, duke i cilësuar si një sfidë serioze ndaj stabilitetit rajonal dhe normave ndërkombëtare. Ministria e Mbrojtjes e Tajvanit bëri të ditur se ka zbuluar avionë dhe anije ushtarake kineze rreth ishullit dhe se forcat tajvaneze janë vënë në “gatishmëri të lartë”, me sistemet raketore aktive për monitorim dhe mbrojtje.
Presidenti Lai Ching-te ka përsëritur se Tajvani është tashmë një entitet sovran dhe nuk ka nevojë të shpallë formalisht pavarësinë. Ai theksoi se administrata e tij synon të ruajë status quo-në, por paralajmëroi se paqja mbështetet në “forcë reale” dhe në aftësinë për të rritur koston e çdo veprimi ushtarak nga Kina.
Ndërkohë, Pekini ka vijuar retorikën e ashpër. Në një postim në rrjetet sociale, ushtria kineze paralajmëroi se çdo përpjekje për pavarësinë e Tajvanit do të “shtypet” përballë asaj që e quan “mburojë drejtësie”.
Tensionet rreth Tajvanit janë rritur ndjeshëm që nga viti 2022, me Kinën që ka intensifikuar stërvitjet ushtarake në rajon, shpesh në përgjigje të veprimeve diplomatike ose ushtarake të Perëndimit. Stërvitjet e fundit konfirmojnë se çështja e Tajvanit mbetet një nga pikat më të nxehta të sigurisë globale.
(Burimi: BBC)
