Një zjarr i rëndë ka shpërthyer në një azil pleqsh në qytetin Manado, në ishullin Sulawesi, duke shkaktuar vdekjen e të paktën 16 personave dhe plagosjen e tre të tjerëve, njoftuan autoritetet lokale.
Sipas shërbimeve të emergjencës, shumica e viktimave u gjetën brenda dhomave të tyre. Dyshohet se banorët e moshuar po pushonin në momentin kur zjarri shpërtheu, mbrëmjen e së dielës, çka e bëri të vështirë reagimin dhe largimin e tyre në kohë.
Punonjësi i shpëtimit Jimmy Rotinsulu i tha agjencisë AFP se ekipet e emergjencës arritën të evakuonin 12 persona të tjerë, të cilët nuk pësuan lëndime dhe u transportuan në një spital lokal për kontrolle mjekësore.
Pamjet e transmetuara nga media vendase tregojnë flakë të mëdha që përfshijnë godinën e azilit, ndërsa banorë të zonës u bashkuan me autoritetet për të ndihmuar në nxjerrjen e të moshuarve nga ndërtesa në flakë.
Shkaqet e zjarrit mbeten ende të paqarta, ndërsa autoritetet kanë nisur hetimet për të zbardhur rrethanat e plota të tragjedisë. Ngjarja ka rikthyer vëmendjen mbi kushtet e sigurisë në institucionet që strehojnë persona të moshuar në vend.
(Burimi: ANSA)
