Këtë të diel, më 29 mars, rikthehet ora verore dhe akrepat do të lëvizin 60 minuta përpara.
Ndryshimi do të ndodhë gjatë natës, në orën 02:00, kur ora do të shkojë direkt në 03:00, duke “humbur” kështu një orë gjumë, por duke fituar më shumë dritë gjatë mbrëmjes.
Ideja e përdorimit të orës verore daton që nga Benjamin Franklin, i cili e përmendi për herë të parë si një mënyrë për të kursyer energji në ndriçim.
Sipas studiuesve, ora verore mund të ketë edhe përfitime për organizmin, pasi përputhet më mirë me ritmin biologjik të njeriut, duke ndihmuar në prodhimin e melatoninës dhe përmirësimin e cilësisë së gjumit.
Megjithatë, debati për mbajtjen apo heqjen e këtij sistemi vijon. Në vitet e fundit, për shkak të krizave energjetike dhe ndikimit në stilin e jetesës, është diskutuar mundësia e heqjes së ndryshimit të orës dhe mbajtjes së një ore fikse gjatë gjithë vitit.
Bashkimi Evropian ka miratuar që në vitin 2019 një direktivë që u jep mundësi vendeve anëtare të zgjedhin nëse do të mbajnë orën verore apo dimërore gjatë gjithë vitit, por vendimi përfundimtar mbetet në dorë të secilit shtet.
Ndërkohë, për këtë vit, ora verore hyn në fuqi sipas traditës, duke sjellë ditë më të gjata dhe më shumë dritë natyrale në mbrëmje.
