Reperi 50 Cent e ka sulmuar prej vitesh Diddy-n në rrjetet sociale, por këtë herë përplasja mes tyre ka kaluar në një fazë krejt tjetër. Reperi i kthyer në producent ka realizuar një serial dokumentar në Netflix me titull “Sean Combs: The Reckoning”. Seriali me katër pjesë, publikuar dje në Netflix, sjell në qendër të vëmendjes akuzat e shumta që prej kohësh e rrethojnë ikonën e hip-hopit.
Regjisorja Alexandria Stapleton tregon se ideja për dokumentarin u nxit pikërisht nga Ventura, e cila këtë vit dëshmoi në një gjyq federal për trafikim seksual, ku Combs u dënua për transportim me qëllim angazhimi në prostitucion. “Pyesja veten se si e gjeti forcën Cassie të dilte kundër një trafikuesi si Sean Combs,” – thotë Stapleton. – “Ishte një provë nëse shoqëria jonë ka ndryshuar me të vërtetë pas lëvizjes #MeToo.” Combs i ka mohuar kategorikisht të gjitha akuzat.
Përplasja mes 50 Cent dhe Diddy-t, megjithatë, ka rrënjë të vjetra. Në vitin 2006, 50 Cent publikoi këngën “The Bomb”, ku nënkuptonte se Combs e dinte identitetin e vrasësit të Christopher Wallace (The Notorious B.I.G.), mikut të tij. Wallace u qëllua për vdekje në Los Angeles në mars 1997, teksa udhëtonte në një automjet tjetër nga ai i Combs, dhe deri sot askush nuk është akuzuar.
Në të njëjtën këngë, 50 Cent e thumbonte Diddy-n duke thënë se “nuk do të ftohej në festat e të bardhëve në Hamptons”, aludim për mbrëmjet luksoze të organizuara nga Combs. Ai ka pohuar ndër vite se beson se Diddy është i lidhur edhe me vrasjen e Tupac Shakur në 1996 – një akuzë që Diddy e ka quajtur “të pakuptimtë”.
Për shumë njerëz, ky duel dukej si lojë marketingu, sidomos duke parë rivalitetin e tyre në industri – madje duke përfshirë edhe markat e vodkës, Effen Vodka për 50 Cent dhe Ciroc për Combs. Por pasi Cassie Ventura ngriti padinë e saj në nëntor 2023, duke pretenduar përdhunim në vitin 2018 dhe abuzim për më shumë se një dekadë të marrëdhënies, konflikti mes dy artistëve mori tjetër drejtim. Pikёrisht kёto zhvillime rikthyen në qendër të vëmendjes pyetjet e dikurshme dhe 50 Cent e shfrytëzoi plotësisht këtë moment.
Në atë periudhë, Diddy zgjodhi të mos përfshihej në betejën publike, duke thënë: “Kur ai vepron kështu, më duket qesharake. Nuk e marr personalisht… nuk është pjesë e jetës sime,” ndërsa këmbëngulte se nuk do të fliste kurrë negativisht për 50 Cent.
Ndërkohë, djali i tij 27-vjeçar, Christian ‘King’ Combs, doli hapur në mbrojtje të të atit. Në maj 2024 ai publikoi këngën “Pick a Side”, ku sulmon kritikët dhe i kundërvihet drejtpërdrejt 50 Cent-it. Reagimi i këtij të fundit erdhi menjëherë, në stilin e tij tipik ironik: “Jam shumë i kërcënuar nga ato që Christian po thotë. Kam frikë për jetën time, ju lutem mos më lëndoni djema,” shkroi ai në Instagram, postim që më vonë u fshi.
