Në një kohë kur vëmendja globale përqendrohet kryesisht te krizat, konfliktet dhe lajmet e këqija, nëpër botë po ndodhin zhvillime pozitive që rrallë marrin hapësirën që meritojnë. Nga mbrojtja e natyrës te përparimet shkencore dhe sociale, këto histori tregojnë se ndryshimi është i mundur dhe se përpjekjet afatgjata po japin fryte konkrete.
Pandat gjigante nuk konsiderohen më një specie e rrezikuar, duke shënuar një nga sukseset më të mëdha të ruajtjes së jetës së egër në dekadat e fundit. Falë programeve të mbrojtjes dhe rikthimit të habitatit natyror, panda ka dalë nga lista e specieve në rrezik zhdukjeje.
Norvegjia ka arritur një objektiv që dikur dukej i pamundur, duke e çuar shpyllëzimin pothuajse në zero. Politikat strikte mjedisore dhe menaxhimi i qëndrueshëm i burimeve natyrore e kanë kthyer vendin në një shembull global për mbrojtjen e pyjeve.
Në Hollandё, inxhinierët kanë zhvilluar një strukturë gjigante lundruese, e njohur si “fshesa me korrent” e oqeaneve, me gjatësi rreth 600 metra, e cila mbledh plastikën nga deti dhe ndihmon në rikthimin e ekosistemeve detare të dëmtuara.
Australia është rrugës për t’u bërë vendi i parë në botë që eliminon plotësisht kancerin e qafës së mitrës, falë vaksinimit masiv kundër HPV-së dhe programeve të avancuara të depistimit.
Ndërkohë, Portugalia po përgatitet të hapë strehën më të madhe të elefantëve në Evropë, një hapësirë që do të mirëpresë kafshë të shpëtuara nga cirqet dhe kopshtet zoologjike, duke u ofruar kushte më të afërta me habitatin e tyre natyror.
Në Hollandё, rënia e ndjeshme e kriminalitetit ka sjellë një realitet të pazakontë: mbylljen e burgjeve. Që nga viti 2009, më shumë se 20 institucione korrektuese janë mbyllur për shkak të mungesës së të burgosurve.
Edhe në fushën e mbrojtjes së specieve detare ka lajme inkurajuese. Breshka e gjelbёr e detit nuk konsiderohet më një specie në zhdukje, falë përpjekjeve të vazhdueshme të organizatave mjedisore dhe programeve të mbrojtjes globale.
Së fundmi, Kanadaja ka miratuar një ligj historik që ndalon robërinë e majmunëve të mëdhenj, përfshirë gorillat, si dhe elefantëve, duke shënuar një hap të rëndësishëm drejt mbrojtjes së të drejtave të kafshëve.
Këto histori tregojnë se, edhe pse shpesh në heshtje, bota po ecën përpara në shumë drejtime. Janë lajme që nuk bëjnë gjithmonë bujë, por që dëshmojnë se përkushtimi, shkenca dhe politikat e duhura mund të sjellin ndryshime reale.
(Burimi: Insta / Humanetica)
