Një prej thesareve më të rralla të trashëgimisë dokumentare botërore ruhet në Shqipëri. Bëhet fjalë për kodikët, dorëshkrime të jashtëzakonshme që përfshijnë edhe një nga “biblat” perandorake më të hershme të njohura.
Së fundmi, Drejtoria e Përgjithshme e Arkivave (DPA) hapi dyert e “dhomës së fortë” për një grup përfaqësuesish nga disa prej institucioneve më prestigjioze evropiane në fushën e trashëgimisë kulturore dhe zhvillimit. Vizita u organizua posaçërisht për t’i njohur nga afër me këto pasuri unike.
Delegacioni u drejtua në ambientet e posaçme ku ruhen dokumentet më të çmuara, të pajisura me kushte optimale për ruajtjen e tyre. Aty, vizitorët patën mundësinë të shohin disa njësi arkivore nga fondi “Koleksion i Kodikëve”, një fond që përfaqëson vetëm një pjesë të vogël të pasurisë së jashtëzakonshme që strehon Arkivi Qendror Shtetëror.
Këto dorëshkrime të rralla dëshmojnë rolin e rëndësishëm të Shqipërisë në ruajtjen e trashëgimisë kulturore dhe shpirtërore të njerëzimit, duke e vendosur vendin në hartën botërore të objekteve me vlerë të jashtëzakonshme historike.
