Gjigandi amerikan i lodrave Mattel ka lançuar një kukull të re Barbie me autizëm, duke zgjeruar linjën e saj që synon të pasqyrojë diversitetin real të fëmijëve në mbarë botën. Modeli i ri i bashkohet koleksionit që tashmë përfshin Barbie me sindromën Down, Barbie të verbër dhe Barbie me diabet të tipit 1.
Kompania njoftoi se kukulla është zhvilluar në bashkëpunim me Rrjetin e Vetë-Avokatisë Autistike (ASAN), një organizatë që përfaqëson të drejtat e personave autikë dhe promovon përfaqësimin e tyre të drejtë në media dhe shoqëri.
Sipas Mattel, kukulla është projektuar me kontribut të drejtpërdrejtë nga komuniteti i autizmit, për të reflektuar mënyrat e zakonshme se si personat në spektrin autik përjetojnë, përpunojnë dhe komunikojnë me botën përreth tyre.
Ndryshe nga kukullat tradicionale Barbie, modeli i ri ka bërryla dhe kyçe të lёvizshme, duke i lejuar të kryejë lëvizje të përsëritura, duartrokitje apo gjeste të tjera që disa persona autikë përdorin për të përpunuar ndjesitë shqisore ose për të shprehur emocionet. Sytë janë dizenjuar pak të pjerrët, për të pasqyruar faktin se disa persona autikë shmangin kontaktin e drejtpërdrejtë me sy.
Kukulla shoqërohet me aksesorë të veçantë: një lodër kundër stresit shqisor, kufje që reduktojnë zhurmën dhe një tablet – elementë që shumë fëmijë në spektrin autik përdorin në jetën e përditshme.
Mattel ka bërë gjithashtu të ditur se do të dhurojë 1,000 kukulla Barbie me autizëm në spitale pediatrike në SHBA që ofrojnë shërbime të specializuara për fëmijët në spektrin autik.
Autizmi është një çrregullim kompleks neurozhvillimor me spektër të gjerë, i lidhur kryesisht me faktorë gjenetikë dhe mjedisorë. Përfshirja e tij në një nga linjat më të njohura të lodrave në botë shihet nga ekspertët si një hap i rëndësishëm drejt normalizimit, pranimit dhe përfaqësimit të fëmijëve me nevoja të ndryshme.
(Burimi: ANSA)
