Marrja e paracetamolit gjatë shtatzënisë nuk rrit rrezikun që fëmija të zhvillojë autizëm, ADHD apo aftësi të kufizuara intelektuale. Ky është përfundimi i një rishikimi të gjerë shkencor të quajtur “standardi i artë” i provave, i botuar në revistën mjekësore Lancet Obstetrics, Gynaecology and Women’s Health.
Ekipi i studiuesve nga disa universitete europiane analizoi 43 studime të mëparshme dhe të dhënat e mbi 1 milion fëmijëve, duke krahasuar zhvillimin neurologjik të tyre me historikun e përdorimit të paracetamolit gjatë shtatzënisë nga nënat.
Rezultati ishte i qartë:
Nuk u gjet asnjë provë shkencore që paracetamoli i përdorur sipas udhëzimeve rrit rrezikun e autizmit, ADHD-së apo aftësive të kufizuara intelektuale.
Profesorja Asma Khalil, udhëheqësja e studimit dhe obstetre konsulente në Londër, deklaroi se:
“Gjetja është e qartë: paracetamoli mbetet një opsion i sigurt gjatë shtatzënisë kur merret sipas rekomandimeve mjekësore.”
Studiuesit theksojnë se paracetamoli është ilaçi i parë që rekomandohet nga autoritetet shëndetësore ndërkombëtare për trajtimin e dhimbjeve dhe etheve te gratë shtatzëna. Shmangia e tij në raste me temperaturë të lartë apo dhimbje të forta, sipas tyre, mund të sjellë rreziqe reale si për nënën ashtu edhe për fetusin.
Studimi gjithashtu sugjeron se faktorët gjenetikë dhe familjarë janë shumë më të rëndësishëm në shfaqjen e tipareve autistike sesa çdo ndikim i mundshëm i paracetamolit.
Ekspertët e neuroshkencës dhe shëndetit publik e kanë mirëpritur publikimin, duke theksuar se ky rishikim “mbyll një debat që ka shkaktuar paqartësi të panevojshme te nënat e ardhshme”.
Në përfundim, autorët e studimit nënvizojnë se paracetamoli, kur merret në doza të kontrolluara dhe me këshillën e mjekut, është i sigurt gjatë shtatzënisë dhe nuk ka prova që ai ndikon negativisht në zhvillimin neurologjik të fëmijës.
(Burimi: The Guardian)
