Një fundjavë me shi të rrëmbyeshëm dhe temperatura të ulëta ka sjellë pasoja fatale për banorët nё Gaza, duke shtuar edhe më shumë vuajtjet mbi një popullsi tashmë të goditur rëndë nga lufta dhe shkatërrimi. Autoritetet lokale njoftuan se të paktën dy persona humbën jetën të dielën, mes tyre një fëmijë shtatëvjeçar, pasi një mur u shemb si pasojë e kushteve të rënda atmosferike.
Sipas Mbrojtjes Civile të Gazës, shumë familje po kërkojnë strehim në ndërtesa të dëmtuara ose në rrënoja të bombarduara, të cilat përbëjnë rrezik serioz gjatë reshjeve dhe të ftohtit ekstrem. Zyra Qeveritare e Medias në Gaza deklaroi se që nga fillimi i dimrit, të paktën 20 persona kanë humbur jetën nga shembja e shtëpive dhe ndërtesave ku ishin strehuar për t’u mbrojtur nga moti i keq. Po sipas këtij burimi, 49 ndërtesa janë shembur si pasojë e kushteve atmosferike.
Për mijëra të zhvendosur që jetojnë në tenda të dobëta dhe të përmbytura nga uji, erërat e forta përbëjnë një kërcënim të vazhdueshëm. Në kampet e refugjatëve në Deir al-Balah, në Gazën qendrore, disa familje kanë humbur edhe strehën e fundit pasi pemë dhe struktura të dëmtuara janë rrëzuar mbi tenda. “Kjo është pema e dytë që na bie mbi tendë për shkak të erës. Ku janë të drejtat e njeriut? Ne po presim vdekjen këtu”, tha për CNN një banor i zhvendosur.
Situata është po aq e rëndë edhe në Khan Younis, ku banorët u zgjuan me tenda të përmbytura pas një nate me reshje intensive. Sipas Mbrojtjes Civile, kushtet aktuale janë të papërshtatshme për jetesë, por njerëzit nuk kanë alternativë tjetër, pasi shtëpitë e tyre janë shkatërruar. “Edhe kafshët nuk do të mund të jetonin në këto kushte, por njerëzit janë të detyruar ta bëjnë”, u shpreh një zyrtar lokal.
Agjencitë ndërkombëtare të ndihmës kanë paralajmëruar se moti i ashpër po përkeqëson një krizë humanitare tashmë alarmante. Kreu i UNRWA, Philippe Lazzarini, theksoi se ndihmat nuk po hyjnë në Gaza në shkallën e nevojshme. “Më shumë shi, më shumë mjerim dhe më shumë vdekje. Njerëzit po mbijetojnë në tenda të mbushura me ujë dhe mes rrënojave”, tha ai, duke bërë thirrje për rritje urgjente të ndihmës.
Kriza e fundit vjen në një moment të ndjeshëm diplomatik, teksa kryeministri izraelit Benjamin Netanyahu pritet të zhvillojë një vizitë në SHBA për t’u takuar me Presidentin Donald Trump, në kuadër të përpjekjeve për fazën e radhës të planit të paqes për Gazën. Ndërkohë, për banorët e enklavës, dimri po shndërrohet në një kërcënim po aq vdekjeprurës sa edhe konflikti që i ka lënë pa shtëpi dhe pa mbrojtje.
(Burimi: CNN)
