Në moshën 84-vjeçare, Martha Stewart vazhdon të jetë jashtëzakonisht aktive. Pavarësisht angazhimeve të shumta, udhëtimeve dhe punës së përditshme, ajo stërvitet pothuajse çdo ditë në orën 6:30 të mëngjesit dhe e quan ushtrimin pjesë të pandashme të jetës së saj.
“Jam ushtruar gjithë jetën,” thotë ajo për Women’s Health. Kur nuk është duke bërë Pilates apo duke ngritur pesha, Martha është vazhdimisht në lëvizje: ecёn shumë, punon në kopsht, udhëton dhe shkon rregullisht në Nju Jork për punë. Sipas saj, rutina e saj fizike ka ndryshuar shumë pak me kalimin e viteve. Edhe sot ajo përdor pothuajse të njëjtat pesha si më parë dhe ndihet e fortë dhe energjike.
Dy herë në javë, ajo stërvitet me pesha në palestër për rreth 45 minuta, ndërsa ditët e tjera bën Pilates, gjithashtu për 45 minuta pa ndërprerje. Pilates-i e ndihmon të ruajë fleksibilitetin, të forcojë kockat dhe të lehtësojë dhimbjet, sidomos për shkak të orëve të gjata që kalon ulur në makinë gjatë udhëtimeve. Ajo praktikon herë pas here edhe yoga, kryesisht në fund të seancave të Pilates-it.
Një rol shumë të rëndësishëm në aktivitetin e saj fizik ka edhe kopshtaria. Martha kujdesej pёr kopshtin e saj që fëmijë dhe ende sot kalon shumë kohë në serat dhe kopshtin e saj, duke mbjellë dhe punuar vazhdimisht jashtë. Kjo e mban aktive çdo ditë.
Qëllimi i saj kryesor është të ruajë muskujt e tonifikuar dhe shëndetin nё pёrgjithёsi. Edhe kur kthehet vonë në shtëpi, ajo nuk e lë pas dore stërvitjen. Përveç kësaj, ushqehet shumë shëndetshëm me perime që i rrit vetë. Çdo mëngjes përgatit një lëng me spinaq, kastravec, majdanoz, selino, mente dhe ndonjëherë portokall e xhenxhefil.
Në këtë periudhë të vitit, ajo gatuan shpesh supa dhe sallata me perime sezonale, ndërsa për ëmbëlsirë zgjedh diçka të thjeshtë dhe natyrale, si farat e shegës. Një stil jete i shëndetshëm, i thjeshtë dhe plot energji, që e mban aktive edhe në moshën 84-vjeçare.
(Burimi: Women’s Health )
