Teatri Kombëtar i Operës dhe Baletit sjell për publikun një eksperiencë unike: një shfaqje-konferencë që zbulon historinë e fshehtë pas një prej baleteve më të dashura të Krishtlindjeve. Ky projekt i veçantë është konceptuar dhe prezantuar nga historiania e artit, Nea Tandini dhe i shoqëruar nga Orkestra Simfonike e Teatrit Kombëtar nën dirigjimin e Sergio Alapont.
Përmes këtij hulumtimi intensiv, spektatori do të ndjekë hap pas hapi rrugëtimin e Pyotr Ilyich Tchaikovsky gjatë viteve 1831–1892, duke zgjidhur misteret e krijimit të Arrëthyesit. Një vepër që shpesh lidhet me atmosferën festive, por që u kompozua në një periudhë të errët personale për kompozitorin, nën presionin e Teatrit Perandorak të Rusisë. Stuhitë emocionale, mungesa e frymëzimit dhe sfidat personale janë pjesë e këtij rrëfimi, që përfundon me shpresën dhe forcën e gjetur përmes muzikës.
Ky event ofron një përvojë të veçantë ku historia dhe muzika bashkohen, duke sjellë për publikun datë 22 dhjetor, një tjetër dimension të njohur të klasikut të njohur botërisht, përtej dritës dhe magjisë së Krishtlindjeve.
Një ngjarje që fton të gjithë të shijojnë emocionin, misterin dhe bukurinë e një prej veprave më të dashura të muzikës klasike, në një mënyrë të re dhe magjike.
