Kompania më e madhe ushqimore në botë, Nestlé, po tërhiqet nga biznesi i akullores dhe paralajmëron shkurtimin e rreth 16 mijë vendeve të punës në nivel global, në kuadër të një ristrukturimi të thellë për uljen e kostove dhe fokusimin në markat kryesore.
Gjiganti zviceran njoftoi se është në “negociata të avancuara” për të shitur biznesin e tij të mbetur të akulloreve te partneri i përbashkët Froneri, me seli në Mbretërinë e Bashkuar. Divizioni, që përfshin marka të njohura si Häagen-Dazs dhe Drumstick, vlerësohet me rreth 1 miliard franga zvicerane (1.3 miliardë dollarë). Transaksioni pritet të përfundojë gjatë vitit të ardhshëm, ndërsa Nestlé do të mbetet pjesë e sipërmarrjes së përbashkët.
Aksionet e kompanisë u rritën me 3% në tregtinë e mëngjesit në Cyrih, përpara se të humbnin një pjesë të fitimeve.
Vendimi vjen në një moment kur kompania synon të thjeshtojë operacionet dhe të rrisë shitjet nën drejtimin e drejtorit të ri ekzekutiv, Philipp Navratil, i cili mori detyrën në shtator pas shkarkimit të papritur të paraardhësit të tij, Laurent Freixe.
Në raportin vjetor të fitimeve, Nestlé njoftoi se do të përqendrohet në katër fusha kryesore: kafe, kujdes për kafshët shtëpiake, ushqyerje dhe ushqime të lehta. “Ne po e përqendrojmë portofolin tonë në katër biznese, të udhëhequra nga markat tona më të forta”, deklaroi Navratil.
Ai e cilësoi biznesin e akullores si një “shpërqendrim” nga portofoli kryesor i kompanisë, duke theksuar se këto marka nuk kanë shkallë globale dhe se Froneri mund të nxisë rritjen më mirë.
Froneri u krijua një dekadë më parë nga Nestlé dhe prodhuesi britanik R&R. Në vitin 2019, Nestlé i shiti Froneri-t njësinë e saj të akulloreve në SHBA për 4 miliardë dollarë.
Nestlé nuk është e vetmja kompani që po largohet nga ky sektor. Unilever ndau njësinë e saj të akullores në dhjetor, duke krijuar The Magnum Ice Cream Company, me qëllim fokusimin në më pak produkte. Biznesi i akullores konsiderohet sfidues për shkak të kërkesës sezonale dhe kostove të larta të zinxhirit të furnizimit për produkte të ngrira.
Paralelisht, Nestlé është në procesin e shkurtimit të rreth 16 mijë vendeve të punës në mbarë botën, si pjesë e përpjekjeve për automatizim, përdorim të inteligjencës artificiale dhe ulje të kostove operative.
Kompania po përballet gjithashtu me pasoja nga një tërheqje e gjerë e formulave për foshnje. Muajin e kaluar, Nestlé tërhoqi disa produkte nga dhjetëra vende, përfshirë Francën dhe Mbretërinë e Bashkuar, pasi u zbuluan gjurmë të toksinës cereulide, e cila mund të shkaktojë të vjella dhe diarre.
Autoritetet franceze po hetojnë vdekjen e tre foshnjave që konsumuan formulë të përfshirë në tërheqje, megjithëse deri më tani nuk është vërtetuar shkencërisht asnjë lidhje shkakësore.
Navratil tha se Nestlé nuk është kontaktuar ende nga autoritetet shëndetësore franceze dhe se zbulimi i cereulidit erdhi nga kontrollet e brendshme të cilësisë, në një përzierje vajrash që përdoret zakonisht në formulë. Pas rastit, Bashkimi Evropian vendosi kufizime më të rrepta për nivelet e kësaj toksine në produktet për foshnje.
Vendimi për të hequr dorë nga akullorja shënon një kthesë të rëndësishme për Nestlé, që po përpiqet të rifitojë ritmin e rritjes në një periudhë sfidash të shumta operacionale dhe reputacionale.
(Burimi: CNN)
