Cinema Paradiso konsiderohet një nga filmat italianë më të bukur dhe më të vlerësuar të të gjitha kohërave, duke fituar pothuajse çdo çmim prestigjioz ndërkombëtar, përfshirë Oscar, Golden Globe dhe vlerësime në Festivalin e Kanës. Por përveç suksesit artistik, ky film ka edhe një lidhje të veçantë me komunitetin arbëresh.
Palazzo Adriano, fshati arbëresh ku mori jetë filmi
Edhe pse aktorët e filmit nuk janë arbëreshë, xhirimet janë realizuar në Palazzo Adriano, një komunë arbëreshe pranë Sicilisë. Lidhja e filmit me këtë fshat është theksuar edhe nga arbëreshi Franco Calima, i cili ka treguar në rrjetet sociale se si Palazzo Adriano u bë pjesë e pandashme e historisë së kësaj kryevepre.
Filmi rrëfen historinë prekëse të Totos dhe Alfredos, ndërsa një nga boshtet kryesore të rrëfimit është dashuria mes Totos dhe Elenës. Regjia e Giuseppe Tornatores dhe muzika e pavdekshme e Ennio Morricones e shndërruan filmin në një nga prodhimet më emocionale të kinemasë botërore.
Sheshi kryesor i fshatit, me shatërvanin në qendër, u përdor si një nga skenat më ikonike të filmit. Ky shesh mbetet edhe sot zemra e Palazzo Adrianos, ku ndodhen dy kishat që shfaqen në film: një kishë e ritit bizantin dhe një kishë e ritit latin, duke reflektuar trashëgiminë kulturore dhe fetare të komunitetit arbëresh.
Muzeu “Cinema Paradiso”, ku filmi vazhdon të jetojë
Në Palazzo Adriano ndodhet edhe Muzeu i filmit Cinema Paradiso, një hapësirë që ruan kujtimin e këtij prodhimi legjendar. Vizitorët mund të shohin objekte origjinale nga seti i xhirimeve, përfshirë biçikletën e Alfredos, projektorin me të cilin shfaqeshin filmat në kinemanë Paradiso, si dhe fotografi dhe materiale të tjera nga realizimi i filmit.
Duke shëtitur nëpër fshat, vizitorët mund të gjejnë edhe shtëpinë e Alfredos dhe atë të Totos, protagonistit të historisë, të cilat janë kthyer në pika të rëndësishme turistike.
Sot, në nderim të filmit dhe trashëgimisë që ai la pas, në Palazzo Adriano organizohet festivali “Paradiso Film Festival”, duke e mbajtur të gjallë lidhjen mes këtij fshati arbëresh dhe një prej filmave më të dashur në historinë e kinematografisë botërore.
(Burimi: KultPlus)
