Një vepër arti e Pablo Picassos me vlerë mbi 1 milion dollarë do të shitet për vetëm 100 euro (rreth 116 dollarë) përmes një llotarie bamirësie që po tërheq vëmendjen në mbarë botën.
Nisma “1 Picasso për 100 euro” u jep mundësinë pjesëmarrësve të fitojnë pikturën “Tête de Femme”, e realizuar në vitin 1941. Për të marrë pjesë, mjafton blerja e një bilete me çmimin simbolik 100 euro, ndërsa në dispozicion janë gjithsej 120,000 bileta. Shorti do të zhvillohet më 14 prill.
Të ardhurat nga kjo iniciativë do të shkojnë për Fondation pour la Recherche sur Alzheimer, që mbështet kërkimet shkencore për sëmundjen e Alzheimerit në Evropë.
Kjo është hera e tretë që organizohet një fushatë e tillë. Edicioni i parë në vitin 2013 ndihmoi në ruajtjen e qytetit historik të Tyres në Liban, ndërsa ai i vitit 2020 financoi projekte për ujë të pastër dhe higjienë gjatë pandemisë.
Sipas Olivier Widmaier Picasso, nipit të artistit, vepra “Tête de Femme” është krijuar në të njëjtën studio ku u realizua edhe kryevepra e famshme Guernica. Ai thekson se vlera reale e saj mund të jetë edhe më e lartë se 1 milion dollarë.
“Është një çmim i jashtëzakonshëm për këdo që e fiton,” tha ai, duke nënvizuar se pikturat e Picasso-s kanë arritur shifra rekord në ankande, si rasti i “Les Femmes d’Alger”, e cila u shit për mbi 179 milionë dollarë në vitin 2015.
Piktura, rreth 35 cm e lartë dhe 25 cm e gjerë, paraqet një figurë femërore në stilin kubist karakteristik të Picassos, me tone gri dhe një shprehje të shtrembëruar që reflekton periudhën e tensionuar të Luftës së Dytë Botërore, kur Franca ishte nën pushtim gjerman.
Vepra është dhuruar nga Opera Gallery, ndërsa ideja e llotarisë lindi si një mënyrë moderne për të kombinuar artin me bamirësinë, duke i dhënë publikut të gjerë mundësinë të zotërojë një kryevepër autentike.
Fituesi do të jetë i lirë të bëjë çfarë të dëshirojë me pikturën: ta mbajë në shtëpi, ta ekspozojë në muze apo edhe ta rishesë. Sipas familjes Picasso, kjo përputhet plotësisht me frymën e artistit, i cili shpesh dhuronte veprat e tij pa kushte.
Një rast unik ku arti, fati dhe solidariteti bashkohen – dhe ku një biletë e thjeshtë mund të të kthejë në pronar të një Picasso-je.
(Burimi: CNN)
