Ish-drejtori i CIA-s, John Brennan, ka bërë thirrje të hapur për shkarkimin e Donald Trump, duke argumentuar se ai është i papërshtatshëm për detyrën dhe përbën rrezik për sigurinë globale.
Brennan, i cili drejtoi agjencinë gjatë presidencës së Barack Obamёs, deklaroi se komentet e fundit të Trump për shkatërrimin e mundshëm të qytetërimit iranian tregojnë një sjellje të paqëndrueshme dhe të rrezikshme.
“Ky person është qartësisht i çrregullt. Mendoj se Amendamenti i 25-të është shkruar duke pasur parasysh Donald Trumpin,” u shpreh ai në një intervistë për MS Now.
Ai shtoi se Trump përfaqëson një barrë shumë të madhe për të vijuar si komandant i përgjithshëm, duke pasur në dispozicion një fuqi të jashtëzakonshme ushtarake, përfshirë arsenalin bërthamor të SHBA-ve.
Deklaratat e Brennan vijnë në një moment tensioni të lartë ndërkombëtar, pas kërcënimeve të forta të Trump ndaj Iranit. Më 7 prill, presidenti paralajmëroi se “i gjithë qytetërimi i Iranit do të vdesë sonte” nëse Teherani nuk do të pranonte ultimatumin amerikan – një deklaratë që, sipas Brennan, nënkupton përdorimin e kapaciteteve bërthamore.
Këto komente kanë nxitur një debat të fortë në SHBA, me gjithnjë e më shumë demokratë që kërkojnë aktivizimin e Amendamentit të 25-të të Kushtetutës amerikane. Ky mekanizëm, i miratuar në vitin 1967, i lejon zëvendëspresidentit dhe shumicës së kabinetit të largojnë presidentin nga detyra nëse ai konsiderohet “i paaftë për të ushtruar funksionet e tij”.
Sipas raportimeve, më shumë se 70 demokratë në Kongres kanë bërë thirrje për përdorimin e këtij amendamenti.
Megjithatë, mundësia që kjo të ndodhë mbetet shumë e ulët, për shkak të mbështetjes së fortë që Trump gëzon nga zëvendëspresidenti JD Vance dhe kabineti i tij.
Situata është komplikuar edhe më tej nga dështimi i bisedimeve të paqes mes SHBA-së dhe Iranit, duke rritur frikën për përshkallëzim të ri të konfliktit.
Komentet e Brennan janë edhe më të forta duke pasur parasysh se ai vetë është aktualisht nën hetim nga Departamenti i Drejtësisë i administratës Trump, si pjesë e një serie hetimesh ndaj figurave që konsiderohen kritikë të presidentit.
Në korrik, nën presionin e Shtëpisë së Bardhë, Departamenti i Drejtësisë hapi hetim penal ndaj Brennan dhe ish-drejtorit të FBI, James Comey. Ky i fundit u akuzua për mashtrim para Kongresit, por akuzat ndaj tij u rrëzuan nga një gjyqtar. Ndërkohë, hetimi ndaj Brennan vijon.
Në mars, aleati i Trump në Kongres, Jim Jordan, deklaroi se hetimi ndaj ish-drejtorit të CIA-s “po nxehet”.
Ndërsa retorika e Trump bëhet gjithnjë e më e ashpër dhe tensionet ndërkombëtare rriten, debati mbi aftësinë e tij për të qëndruar në detyrë pritet të intensifikohet edhe më tej.
(Burimi: The Guardian)
