Një ngjarje e pazakontë dhe tronditëse e regjistruar në Brazil po bën xhiron e rrjeteve sociale, duke kujtuar se problemet me pusetat dhe kapakët e dëmtuar të tyre nuk janë vetëm një fenomen shqiptar.
Kamerat e sigurisë filmuan momentin kur një grua 31-vjeçare u përpi nga toka ndërsa po shkonte në punë, pasi kapaku metalik i një pusete u hap papritur nën këmbët e saj.
Ngjarja ndodhi në Rio de Janeiro, në një trotuar pranë një shkolle në rrugën Rua Oto de Alencar.
Pamjet tregojnë gruan duke zbritur nga një motoçikletë dhe duke ecur qetësisht drejt vendit të punës. E pavetëdijshme për rrezikun që e priste, ajo vazhdon rrugën duke parë telefonin celular. Vetëm pak sekonda më vonë, sapo shkel mbi kapakun e pusetёs, metali lëviz dhe gruaja zhduket brenda saj.
Kalimtarët dhe drejtuesi i motoçikletës që e kishte sjellë në vendngjarje vrapuan menjëherë për t’i ardhur në ndihmë.
31-vjeçarja u transportua me urgjencë në spital, ku mjekët konstatuan lëndime të moderuara, por fatmirësisht jashtë rrezikut për jetën.
Hetimet e autoriteteve zbuluan se vetëm pak orë para aksidentit, të njëjtat kamera sigurie kishin filmuar dy persona duke lёvizur kapakun e pusetës.
Sipas autoriteteve lokale, dyshohet se ata po përpiqeshin të vidhnin pjesën metalike. Në pamje duket se kapaku hiqet nga vendi, por më pas njëri prej personave tenton ta vendosë sërish. Megjithatë, ai nuk arrin ta fiksojë siç duhet, duke krijuar kurthin që më vonë do të shkaktonte aksidentin.
Bashkia lokale njoftoi se pas identifikimit të dy pusetave të zhvendosura në zonë, ekipet e mirëmbajtjes ndërhynë menjëherë për zëvendësimin dhe sigurimin e tyre.
Ngjarja ka sjellë në kujtesë edhe një problem që shqiptarët e njohin prej vitesh: vjedhjen e kapakëve të pusetave, duke krijuar rrezik për këmbësorët dhe automjetet.
Megjithatë, nëse ka një dallim mes Brazilit dhe Shqipërisë, ai është se tek ne pusetat e vjedhura rrallëherë mbulohen përsëri në mënyrë të pasigurt. Zakonisht ato mbeten hapur, në formën e tyre më të sinqertë, të shoqëruara herë me një degë peme, herë me një bidon plastik, një gur, një gomë makine apo ndonjë “flamur” improvizues që valëvitet në erë si dëshmi e mungesës së përgjegjësisë së pushtetit vendor.
Nuk është zgjidhja më moderne, por të paktën kalimtari e kupton menjëherë se përpara ka një gropë dhe jo një kurth të maskuar nën këmbët e tij.
